Текст на языке оригинала
Се яз, князь Володимер Андреевич, пожаловал есми живоначальные Троицы Сергиева манастыря игумена Иону з братьею, или кто по нем иный игумен будет в том манастыре, что их село манастырское Илемна з деревнями в нашей отчине в Верее. И кто у них в том селе и в деревнях учнут жити людей, и тех их людей наместници наши верейские и их тиуни не судят ни в чем опричь одного душегубства, а праведчики и доводчики поборов своих на них не берут и не въежжают к ним ни по что, а ведает и судит игумен тех своих людей сам во всем, или кому прикажет. А случится суд сместной тем их людем з городцкими людьми или с становыми, и намесници наши верейские и их тиуни тех их людей судят, а приказщик манастырской с ними ж судит, а прав будет, или виноват городцкой человек или становой, и он в правде и в вине наместнику и его тиуну, а прав будет, или виноват манастырской человек, и он в правде и в вине манастырю, а наместници наши верейские и их тиуни в манастырского человека не вступаются ни в правого ни в виноватого ничем, а кому будет какого дело до манастырского приказщика, ино его сужу яз, князь Володимер Андреевич, или мой боярин введенной. Также есми их пожаловал: те их люди к дворским, ни к сотцким, ни к десятцким с черными людми не тянут ни во что ни в какие проторы, ни в розметы, ни коня моего не кормят, ни сен не косят и закосного не дают, ни двора моего, ни волостелиных не ставят, ни поворотного не дают, а хто у них з дерева убиется, или кого дерево убиет, или в воде утонет, или хто от своих рук утеряется, или их уловомод подкинут, и наместници наши того обыщут да велят того и схоронити безпенно, а хрестьяном их в том продажи не учинят. Также и пятенщики мои верейские конеи у манастырских людеи не пятнят, а держит манастырской приказчик у себя пятно свое манастырское, и кони у манастырских хрестьян пятнит своим пятном. Также есми пожаловал игумена з братьею: дают мне с того села и з деревень з году на год на Рожество Христово за дань и за ямские деньги и за примет в мою казну оброком восмь рублев денег. А у кого у манастырских людей будет пир или братчина, и к тем к их людем к манастырским на пир не зван не ходит нихто, а хто придет к ним на пир или на братчину не зван, и они того вышлют вон безпенно, а хто у них учнет пити сильно, а учинится у них какова гибель, и ему та гибель платити без суда и без исправы. А наши недельщики дают на поруку манастырских христиан, также и от манастырских хрестьян, а учинят манастырским хрестьяном два срока в году: зиме в тои ж день по Крещенье Христове, а лете на Петрово заговенье, а хто на манастырских хрестьян накинет срок, а не по сему их грамотному сроку, и яз им к тому сроку ездити не велел, а хоти на них хто возмет и безсудную грамоту, а не по сему их грамотному сроку, и та безсудная не в безсудную, а пристав езду лишен, а у которого будет наместника или у волостеля моя жаловалная грамота на грамоты, а на сю мою грамоту грамоты нет, а коли явят сю мою грамоту нашим наместником или волостелем и их тиуном, и они с нее не дают ничего. А дана грамота на Москве лета 7000 пятьдесят шестаго генваря в 1 день.