Текст на языке оригинала
Се яз, князь Володимер Ондреевич, пожаловал есми Троицы Живоначальные Сергиева монастыря келаря Дорофея з братьею (а архимандрита в те поры у них не было), или хто вперед у Живоначальные Троицы в Сергиеве монастыре архимандрит будет. Били они нам челом о том, что их монастырское село Рожественое з деревнями в Дмитровском уезде в Берендеевском стану, и на то де у них село з деревнями жаловалная грамота царя и великого князя Ивана Васильевича всеа Русии от дани, и от ямских денег, и от посошные службы, и от городового дела, и от мыту, и от тамги, и от сенокосов, и от дворовых дел, и от мостовщины, и от черных розметов, и от иных ото всяких пошлин, и от намеснича, и от волостелина суда, и от праведчиковых, и от довотчиковых поборов, и от пятенных пошлин, и от продажи в душегубстве, и на которые сроки наметывати на них приставом срочные, да на царское ж де имя та у них грамота подписана, а на подписи деи написано: «Лета 7059-го маия в 17 день царь и великий князь Иван Васильевич всеа Руси тое их грамоты слушал и рушити ее не велел никому ничем опричь емских денег и откупных, и посошные службы, и тамги, и мыта – то им довати, а коли из тех своих сел повезут хлеб и всякой зопас на монастырской обиход, а не на прадажю, и им с того зопасу мыта и тамги не довати». А опричь деи тое подписи велел у них царь и великий князь ходити о всем по тому, как в тои их грамоте подписано, а у подписи деи припись царева и великого князя дьяка Юрья Сидорова, и та деи у них грамота в монастыре в казне, да с тое з жаловалные грамоты и с подписи, какова подпись у грамоты назоди подписана на царское имя, положили перед нами список слово в слово за килоревою печатью, и нам бы их пожаловати: выслушав, с тое их жаловалные грамоты и с подписи списка велети им на то село Рожественое з деревнями дати своя жаловалная грамота такова ж, какова у них на то село з деревнями жаловалная грамота царя и великого князя Ивана Васильевича всеа Руси и как у них на тои грамоте на подписи написано. И яз, князь Володимер Ондреевич, с тое их з жаловалные грамоты и с подписи, что назади у грамоты, списка слушал, и выслушев з грамоты и с подписи списка Троицы Живоначалные Сергиева монастыря келаря Дорофея з братьею, или хто вперед у Живоначальные Троицы в Сергиеве монастыре архимандрит будет, пожаловал: хто у них в том селе и в деревнях учнут жити людей, и те их люди нашего городового дела не делают, ни сен наших не косят и не возят, ни коня моего не кормят, ни двора моего ни намесничя ни волостелина не ставят, ни ямского двора не ставят же, ни мостов не мостят, ни гатеи не готят, ни к сотцким, ни к дворником с тяглыми людми не тянут ни в которые про (Л. 2) торы ни в розметы, ни иные им никоторые пошлины не надобе оприч ямских денег и посошные службы, и откупных, и тамги, и мыта, а ямские деньги с сох по розводу, по чему в котором году мы велим ямских денег положити, и за посошную службу, и откупные деньги, и тамга, и мыт – то им давати. А коли они из с тех своих сел повезут хлеб и всякой запас, или ис которых городов купив повезут в монастырь мед, и рыбу, и масло, и инои всякои запас на монастырской обиход, а не на продажю, и они с того запасу мыта и тамги не дают. А намесницы наши дмитровские и волостели, и их тиуны берендеевские тех их людей не судят ни в чем, опричь душегубства и розбоя с поличным, а праведчики и довотчики поборов своих у них не берут и не въезжают к ним ни по что, а ведают и судят тех своих людеи келарь Дорофеи з братьею, или хто вперед архимандрит будет сами, или кому прикажют, а кому будет каково дело, городцкому человеку или волостному до монастырского человека, или монастырскому до городцкого или волостного, и наши намесницы дмитровские и волостели и их тиуны тех их людей судят, а келарь Дорофей з братьею, или хто вперед архимандрит будет с ними ж судят, или их приказщик, а прав ли будет, виноват ли городцкой человек или волостной, и он в праве или в вине намеснику или волостелю и их тиуном, а келарь Дорофей з братьею, или хто вперед архимандрит будет с ними ж судят или их приказщик. А прав ли будет, виноват ли городцкой человек, или волостной, и он в праве или в вине намеснику или волостелю, и их тиуном, а келарь Дорофей з братьею или хто вперед архимандрит будет, или их приказщик в того не вступаютца, а прав ли будет, виноват ли монастырской человек и он в праве или в вине келарю з братьею или архимандриту, хто вперед архимандрит будет, а намесницы наши дмитровские и волостели и их тиуны не вступаютца ни в правого, ни в виноватого. Также есми пожаловал келаря Дорофея з братьею, или хто вперед архимандрит будет: пятнать им лошади в том селе монастырским пятном, а хто у них з дерева убьетца, или от своих рук утеряетца или возом сотрет, или утонет, или иная которая смерть случитца, и оне являют нашим дмитровским намесником и волостелем и их тиуном, и они им в том продажу не чинят, а кому будет каково дело до монастырских людей, ино их сужю яз князь Володимер Ондреевич, или мой дворетцкой, а срок им чинят один в год зиме Середохрестье Христово, а хто на них возмет не по их сроку правую грамоту или безсудную, и правоя не в правую, а безсудноя не в безсудную. А у кого будет грамоты на грамоты, а на сю мою грамоту грамоты нет. Лета 7074-го августа в 1 день.