Текст на языке оригинала
По деда своего грамоте великого князя Дмитрея Ивановичя и по отца своего грамоте великого князя Василья Дмитреевичя се яз, князь велики Василеи Васильевич, пожаловал есми своих руских тонников, внучят и правнучят Якимовых и Михеевых и Олухиных и Демешковых Микиту и Есипа з братьею и Кузму и Перфурья, Онтона з братом. Дал есмь им грамоту по старым грамотам. Погоста им не платити, ни в чернои бор им не тянути, а литовскому послу подвод им не давати, ни на дворе у них не стояти, ни новгородскому послу на дворе оу них не стояти, ни корму ни подвод им не давати. А сотнои соли Миките и Есипу з братьею и Кузме и Перфурью ни их другом не платити рушаном. А давати им мне, великому князю, по три берковски меду через год, а не будет меду, ино по три рубли. А в виру им с рушаны не тянути. А дрова им по рекам плавити на себя. А русским промыслом им промышляти, соль варити. А с рушаны им в их потуг не тянути. Ни подвоиским руским их не позывати. Ни посаднику русскому их не судити, ни с поличным. А скуе в Русе, ино взять у них дворянину пять кун. А в Любце им земля орати, где им любо. А иному не вступатися в ту землю в мою, князя великого. А завод тои моеи [земле]: (Примечание: в ркп. нет, добавлено по смыслу и по АСЭИ, т. 3, № 21) от Полисти реки по Воеи ручеи, а от Воя ручья до Ближнеи Соминки по Радынь путь, а от Ближнеи Соминки до Далнеи Соминки, а от Далнеи Соминки Конюшьим путем до Редьи реки в Гоболеи ручеи. А косити моим тонником русским по Конюшеи путь, а вниз по обе стороны Соминки по Роскреси. А дворяном моим з Городища ни подвоиским новгородским ни биричем ни софьяном владычним моих тонников русских не позывати ни в какове деле. А кому будет до них каково орудье, ино ехати на них от великого князя ловчему, а отпущенику не ехати, в его место никому не позывати. А без меня, без великого князя, не судити никому, или без наместника. А звати их с осеннего Николина дни до Середохрестья. А позовнику взяти гривна ездов. А что дана пожня Святеи Богородици, а та косити старостам по Зимнеи выезд до Комарова ручья. А хто через сю грамоту подеет силу над ними, и яз, князь велики, могу боронити. А на сю грамоту инои грамоте не быти.