Текст на языке оригинала
Се ӕз, князь великий Иван Васильевич всеа Русии. Пожаловал есми б(о)гомолца м(анас)т(ы)ри своее Троецкого игумена Иону з братьею, что на Махрище, или хто по нем иный игумен в том манастырѣ будет. Били ми челом о том, что их села и д(е)р(е)вни манастырские в Переславском уѣзде в Великой слободѣ село Зеленцыно да д(е)р(е)вни Высокое, Запрудное, Площицыно, Лукьяново, да еслцо Юрцово, да д(е)р(е)вни Рыкулино да починок Захарѡв, да в Кинеле д(е)р(е)внѧ Заполье Панинские земли Дуплевские, да в волости в Марининѣ в Борисоглѣбскомъ стану селцо Нѣглово да д(е)р(е)вни Данилково, Заламаево, Онисимово, Красное, Малиново да к Малинову ж пустѡшь Малетино да Попово, да пустошь Новинки Лобановские земли, да селцо Полосино, да д(е)р(е)внѧ Глинково да пустошь Рѧзаново. И тѣх деи селца и д(е)р(е)вни, а перед Серги[…] сошном писмѣ расписаны были порознь и подати де наши всѧкие с манастырских селъ и д(е)р(е)вень давали на рознь ж. И в том де тѣм селом и д(е)р(е)внѧмъ убыток […] и манастырь де ѡт того ѡскудѣлъ. И ӕз, кнӕзь великий Иван Васильевич всея Русии игумена Иону з братьею пожаловал, велѣл есми писцом своим переславским Ивану Федоровичю Хидырщикову да Василью Юрьеву с(ы)ну Безобразова с товашищи тѣ их селца и д(е)р(е)вни в сошном писмѣ списатм в одном мѣсте. И […] приписати их к городу къ Переславлю к Великой слободѣ. И хто у них в тѣх селцѣх и в д(е)р(е)внѧх учнет жити людей, и тѣм ихъ людем не надобе моѧ великого кн(я)зѧ дань, ни мыт, ни тамга, ни ӕвка, ни перевозъ, ни конѧ моего не кормѧт, ни сѣн моих не косѧт, и хором на ѧмѣхъ не ставѧи. И з городцкими людми с переславцы и сановыми и с слободцкими к соцким и къ десѧцкимъ с тѧглыми людми не тѧнут ни в какие проторы ни в розметы. А намѣстницы н[а]ши переславские и волостели марининские и слободцкие и кинелские и их тиуни игумена з братьею и их людей и крес[ть]ян не судѧт ни в чем, и кормов своих на них не емлют, и не всылают к ним ни по что. А во д[у]шегубных дѣлех судит их намѣстник н[а]ш переславской. А волостели маринински и слобоцкие и кинелские въ д[у]шегубные дѣла у них не вступаютца. А оприч д[у]шегубных дѣлъ тѣх своих людй и кр[е]стиан во всѧких дѣлех вѣдает и судит игумен з братьею или кому прикажет. А случитца суд смѣстной тѣмъ их людем з городцкими людми или с волостными и намѣстницы наши переславские и их тиуни судѧт. А игумен з братьею или их приказчикъ с ними ж судит. А прав ли будет или виноват манастырской ч[е]л[о]векъ и он в правде и в винѣ игумену з братьею. А намѣстницы н[а]ши переславские и их тиуни въ их в манастырского ч[е]л[о]века ни в правого ни в виноватого не вступаютца. А прав ли будет или виноват городцкой ч[е]л[о]векъ или волостной и ѡн в правдѣ и в винѣ намѣстнику или волостелю и их тиуномъ. А кому будет чего искати на самом игуменѣ или на братье и на их людех и на крестьянех ино их сужу ѧз, кнѧз великий или мой боѧрин ввведеной у которого будетъ м[о]н[ас]тыри моеи великие кн[я]г[и]ни дворецъ в приказе. А хто у них ѡт своих рукъ утерѧетца или ко[го] в лѣсе дерево убьет или з дерева ис хоромины убьетца или озѧбнетъ или кого звѣрь сьѣстъ или хто в водѣ утонет или кого водою принесет и[ли] кого возѡм сотрет или хто кого подкинет уловом не знаемым ч[е]л[ове]к[о]мъ, а обыщут того безхитростно и крес[ть]аном манастырским в том вѣры и продажи нѣ[т]. А учинитца у них въ их селцѣх или в д[е]р[е]внѧх д[у]шегубство, а не доищутца д[у]шегубца, и они дадут нашим намѣстником переславскимъ и их тиуном за голову вѣры четыре рубли, то ему со всѣми его пошлинники. А доищутца д[у]шегубца, и они его выдвдут нашим намѣстником и их тиуном, а хрес[ти]аном в том виры и продажи нѣи. Такъ ж есми игумена Иону з братьею пожаловал. Наши кн[я]зи и боӕре и воеводы ратные и служилые татарове и талмачи и всѧкие ездоки у них въ ихъ селех и в д[е]р[е]внѧх в манастырских силно не ставѧтца и кормов и проводников и сторожей у них не емлют. А случитца кому у них стати, и он у них кормъ свой и конской купит по цѣнѣ как ему продадут. А коли их манастырские крес[ть]ан поѣдут к Москвѣ о жалобе а без товару, и наши и намѣстничи и волостелины мытчики и перевозчики и всѣ пошлинники на них мыта и перевозу и иных никаких пошлин не емлют. А гѡнцы наши у манастырских хрес[ти]ан на дорозѣ и на Москве диаки н[а]ши ӕмские и подъӕчие и дворники подвод и проводниковъ не емлют. Такъ же есми игумена з братьею пожаловал. Пожалую которого своего намѣстника или волостелѧ, дамъ ему и над грамотчики свою грамоту, а на сю мою грамоту грамоты нѣт. А через сю мою грамоту хто чѣм игумена з братьею изобидит или что не по грамотѣ учинит, и тому ѡт менѧ ѡт великого кн[я]зѧ быти в опале и в продаже. А поли сю мою грамоту игумен з братьею ӕвит намѣстником и волостелем и их пошлинником, и они с неѣ ӕвки не дадутъ ничего. А дана грамота на Москве лѣта 7051 марта въ 16 день. На обороте: Кнӕзь великий Иван Васильевич всеа Руси; † В нижней части оборота: Приказал боярин кнӕзь Петръ Иванович Репнин Оболенской; †
Комментарий терминологический
Мыт – пошлина за проезд и провоз товаров. Тамга – торговая пошлина. Ӕвка – название пошлины, платимой при явке людей или товаров. Перевоз – пошлина за право пользоваться переводом. Вӕра – речь идет о вире, т.е. штрафе в пользу князя за убийство. Продажа – штраф за преступление, судебная пошлина.