Текст на языке оригинала
Се ӕз, царь и великий князь Иван Васильевич всея Русии. Пожаловал есми в своей отч(и)нѣ в Великом Новѣ городе Р(о)ж(д)ества Пр(е)ч(и)стые Михалецкого манастырѧ игуменью Агрепѣну с сестрами и с попы и со всѣмъ причтомъ ц(е)рковным или хто по них инаѧ игоуменьѧ с сестрами и попы и весь приче ц(е)рковной в том манастырѣ будут. Били нам челом, а сказывают: дѣда н(а)шего великого князѧ Ивана Васильевича всея Роусии и отца н(а)шего великого князѧ Василиѧ Ивановича всеа Руси и н(а)ше жалованье за ними. В Новогороцком уезде в Бѣжецкой пѧтине волость Кушевѣера Алеѯандровскаѧ Самсонова сто пѧтнатцать обеж без четверти обжи. А доъъоду де хлѣбного с тоѣ волости и старины идет игуменее с сестрами две выти. А двем попом да дьѧкону да двемъ ц(е)рковным диѧком да двем понамарем да проскурницѣ треть и ис тоѣ де трете идет двем попам по две выти да дьѧконоу полторы выти. А двем диѧком две выти двем понамаремъ выть проскурницѣ полвыти да ново де прибавили дву звонцовъ а им деи полвыти ж. И та де ихъ волость ѡт Нова города ѡт их манастырѧ ѡтдалѣла верстъ де до неѣ ѡт них болши полу третьѧ ста. А на сужме де около тоѣ волости многи наших детей боӕрских Бѣжецкие пӕтины помѣщиков поместьѧ и от тех де детей боӕрских в землѧх и во всѧких делѣх и от проѣждих людей кр(е)стиѧном тоѣ их Кушеверские волости чинѧтца насилства и обиды великие а им деи тѣх своих кр(е)стьѧн от обид оуберечи не мочно потому что де от них оудалѣли. И тѣх де длѧ их многих обид тем своим кр(е)стияном ѡнѣ всегды лготѧт. Да и тягли де многие во много лѣтъ измогаѧсѧ и заимуѧ за тѣх своих кр(е)стьѧн платили сами собою. И ѡт того де они сами одолжали и вперед де имъ н(а)ших тѧгле и за тѣх своих кр(е)стьѧн платити и своих оубытков на тѣх своих кр(е)стиӕнех взѧти не мочно потому что де тѣ кр(е)стиӕнѣ от обид да и они за них платѧчи обнищали и ѡборонити де им их ни от ни от кого не мочно длѧ того что ѡнѣ келейные старицы тѧгати не оумѣют, а свѧщенники де их и ц(е)рковные люди сами в волость не ѣздѧт длѧ далнего поути. А поберечи же им тѣх своих кр(е)стиѧн посылати нѣкого ж. И нам бы их пожаловати та их манастырскаѧ Кушевѣръскаѧ волости стопѧтнатцать обеж без чети обжи велѣти б оу них взѧти на себӕ, царя и великого князя, а их бы нам в то мѣсто пожаловати поближи к Нову городу и к их манастырю в Шелонской пӕтине н(а)шею оброчною волостью Любынѧми, что б н(а)ша б(о)гомолья их манастырь не оскудѣл, а им б как было мочно питатись и не одолжати. А в приправочных в новогороцких книгах Бѣжицкие пѧтины приправки Федора Семенова сына Нелединского лѣта 7 059 году написано: в погосте в Коузмадемьѧнском в Кушевѣре Пр(е)чистые Михалицкого манастырѧ волости Алеѯандровская Самсонова, а в ней Михалицкого манастырѧ шестьдесят три д(е)р(е)вни да после писма стали пять починков, а обеж в тѣх д(е)р(е)внях и в новоприбылых починках живущих семядесят восмь обеж без четверти да пустых притцать семь обеж и обоего сто пятнатцать обеж без чети обжи да два озера – Большое да Меншое Коузивские. А о чом намъ Михалицкого манастырѧ игоуменеѧ Агрепѣна с сестрами на обмѣну были челом. И в новогороцких в перечневых книгах что прислали к нам из н(а)шие отчины из Великого Нова города диѧкы Чюдин Митрофанов с товарыщи лѣта 7 059 а выписаны тѣ перечневые книги из писцовых книг писма дьяка Василия Тетерина да дворцового дьяка Звяги Софонова лѣта 7 020 третьѧго в Шелонской пӕтине Пшажского присуда в н(а)ших в оброчных волостѧх волость, что была Юрьева манастырѧ, погостъ Любынской, а в нем ц(е)рковь С(вя)тых ап(о)с(то)лъ Петръ и Павел, а тому погосту д(е)р(ев)ни черные пустошь Мошница, д(е)р(е)внѧ Якшино, пустошь Иваново, пустошь Кн(я)зево, д(е)р(е)внѧ Лешово, д(е)р(е)внѧ Болха, д(е)р(е)внѧ Шепицы, д(е)р(е)внѧ Оботлицка, селцо Солоницко, д(е)р(е)внѧ Подклене, д(е)р(е)внѧ Ӕщюра, пустошь Заолшажье, д(е)р(е)внѧ Лӕцка, пустошь Вѧзовно, пустошь Сухлово, да к той жи пустоши приписано нива Теребиха что была розпашенеские д(е)р(е)вни, д(е)р(е)вн.. Клевичи, д(е)р(е)внѧ Грѧда, д(е)р(е)внѧ Еревша, д(е)р(е)внӕ Розпачи, д(е)р(е)внѧ Яблошко, д(е)р(е)внѧ Рѣка, д(е)р(е)внѧ Середнӕѧ, д(е)р(е)внѧ Маркова, д(е)р(е)внӕ Филипково, д(е)р(е)внѧ Петрово, д(е)р(е)внѧ Ӕмница, д(е)р(е)внѧ Мѧкова, д(е)р(е)внѧ Колоненка пуста, д(е)р(е)внѧ Помяково пуста ж, пустошь Островка, пустошь Залѣтное, пустошь Захоное, д(е)р(е)внѧ Волочно, д(е)р(е)внѧ Круга, д(е)р(е)внѧ Дубравка, д(е)р(е)внѧ Веретеѧ, пустошь Струга. А обеж в той волости в погосте и в селцѣ и в д(е)р(е)внѧх семдесят две обжи. Да в приправочных книгах приправки Ивана Белеутова лѣта 7 059 в тои ж Любынской волости починков, что стали ново после писма починок Кирилкино, починок Жар, починок Куриско, починок Гумнище, а в них две обжи с четвертью обжи. И переидет в волости в Кушевѣре перед Любынскою волостью сорок обеж с полуобжею и с пустыми. И ӕз, царь и великий кн(я)язь Иван Васильевич всея Роусии Р(о)ж(д)ества Пр(е)ч(и)стые Михалецкого манастырѧ игоуменю Агрепѣноу с сестрами и с попы и со всѣмъ ц(е)рковнымъ причтом или хто по них инаѧ игуменьѧ с сестрами и попы и весь причет ц(е)рковной и в том манастырѣ будутъ против их манастырские Коушевѣрьские волости пожаловал в Шелонскои пѧтине тою н(а)шею оброчною волостью Любынским погостом и селцом Солоницкимъ оприч того, что в томъ ж селце жеребеи Покровского манастырѧ озера Сылмерѧ и д(е)р(е)вни и пустошми и новоприбылыми починки тоѣ волости и с пашнѧми и с покосы и с пожнѧми и с лесы и с озеры и со всѣмъ с тѣи что к тои волости из старины потѧгло во всѣми оугодьи впрок к тому манастырю и с доходы з денежными и с хлебными оприч моеи, царя и великого князя, обежные дани и их иных н(а)них податей, которые н(а)ши подати и с ыных манастырских земель намъ идутъ. А волость манастырскую Коушевѣру велѣли есмѧ у них взѧти на себѧ, царѧ и великого князѧ, а в доходех в денежных и в хлѣбных с тое Любыньские волости дѣлити имъ по старинѣ игоуменее с сестрами всѧких доходов две выти, а двем попом да дьякону да двемъ диакомъ ц(е)рковнымъ да двемъ понамарем да проскурнице да двем звонцомъ треть и ис тоѣ трети двем попомъ по две выти, а диаконоу полторы выти, а двем диаком ц(е)рковнымъ две выти, двем понамаремъ выть, проскурнице полвыти, двем звонцом полвыти ж. А дѣлити имъ всѧкими доходы по сему н(а)шему указу и по старинѣ, по тому ж, как ис Кушевѣръскые волости меж себѧ доходы дѣлились. А земел им меж себѧ тоѣ волости не делити. Земли имъ и крестиѧнъ вѣдати и беречи и пашню, которую на манастырь оустроѧтъ пахати вмѣсте заодинъ, а не врознь. А дана грамота на Москве лѣта 7060 осмаго февраля. На обороте: Царь и великий князь Иван Васильевич всея Русии