Текст на языке оригинала
В имя Отца и Сына и Святого Духа. Се яз, раб Божии Григорьи скимник Иванове, пишю рукописанье при своем животе. Приказываю братьи своеи и племяни своему, Ларивону и Дмитру, и зятьи своеи, дочереим своим, Оксиньи и Марини, и внучатам своим, буди вам ведомо. Что есмь продал село на Лукыни берьгы за озером святому Николи — и в векы и старыми грамотами, игумену Василею и всеи братьи черенцамъ: двор и дворище, на гори 3 поля, по[д] двором орамая земля, да пожня наволок, да другыи навълок пожни Карлаевескыи, и притеребы, и заполькы, и репища, и ловища, и в речекы участок ловити, на юрмоли орамая земля Пуп и пожня, от Ивановицев межи от ивовъго куста верх до коньць логу, другая пожня противу погоста, межа от Карлаеви межи до Дурневи межи, орамая земля, овсище урецище, межа от Степанови межи от попъви до Тимошкини межи, в Кепали орамая земля, а с Гришкою улица проежьщая по пъловинам, а межа до Дурневи межи. И дали на тои земли и на двори и на пожнях 5 съроков белкы, корова попълънка, никольских кун. А то село святому Николе [в] векы. А хто буде моего роду, или племяни, или братьи, или зятьи, или дочереи, или внуцат, а хто имет мое, старцево Григорьев, проданье подвигывати, дадут святому Николе 50 съроков белкы да корову попълънък с приплодом. А на то Бог послух и отець мои душевнои игумен Васильи святого Николе. А на души были: Михаило Офромеевич, Максим Федорович, Левонтьи Сменович, поп Степан, зять его, Селюша Павлове, Тимошка Федоров, Тимофеи Баи, Павле, зять его, Левуша Бутаков. А у печати стоял игумен Васильи да Григорьи старьць сам.