Се яз, Семен Григоров сын Кологривова променял есми старцю Артемью Троецкого Сийского монастыря в Ненаксе на наволоки тринатцатой сугреб росолу своего Николской варници. И по тому тринатцатому сугребу в варници, и в церене, и в колодези в росолном, и в кострищах. А в сябрех с Николскими старцы Корелского монастыря да с Ываном с Коковиным и с ыными сябры. А выменил есми против того у старца Артемья Троецкого монастыря росолу на наволоки же тринатцатой сугреб глубокой варници, и потому тринатцатому сугребу в варници и в церене и в колозеди в росолном и в кострищах. А в сябрех с николскими же старцы да с Козмою с Каляниным и с ыными сябры. А сменили есмя теми тринатцатыми сугребами меж собою полюбовно, в дернь без выкупа. А опред нам тем росолом не розмениватис. И менные есмя писали меж собою две по противням слово в слово. На то послуси Павел Григорьев сын Коровай да Перфирей Яковлев сын Карташев. Менную писал петровской дьячек Патрекейце Петров сын лета з девятдесятого июля в 13 день.