Се яз, Олександр Обрезок да яз, Фома Былца Ивановы дети Сухого, оба нас братеники, отступилися есмя своего владенья на Смердьих местех в варнице в Ершихе шестонадцатой выти в варнице, и в церене, и росолу великого князя на ту шестонатцатую выть варници. А отступились есмя того своего участка в варници и церена шестонатцатой выти Святой Троици в дом Сейского манастыря игумену Антонью иже о Христе и з братьею за Григорьевы дети Толстого за четыре рубли. А отступились есмя и со всеми угодьи, и с кострищи, и с кошками, и с пожнями, что доведетца полчети на ту шестонатцатую выть варници и церена. А отступились есмя Светей Троице в дом в дернь без выкупа. А в себрех та варница и церен с Ываном старожилом и с Васильевыми детми с Ершовыми, и с ыными сябры. А в оцищеньи и в снимке тое шестонатцатой выти в варници и церена оба нас брата яз, Обрезок и Былца, и от кабал и от закладных и от купчих. А на то послуси Кирило Иванов сын Орел да Василей Василиев сын Москвитин, а отступную писал дьяк земской Ивашко Федоров сын лета 7059 февраля 17 день.