Текст на языке оригинала
Во имя отца и сына и святого духа. Се яз, Григорей Данилов сын, пишу сию духовную грамоту при своем животе, своим целым умом и разумом. А нет ми даня никому ничего, а взятя нет же ни у кого ничего же. А что у меня деревенька на Прилуке в Великом селе две веревки земли горныя и луговыя по своей купчей да и ту землицу, что ми з делу досталос от батка своего Лукинскую, и яз, Григорей ту деревенку и с тою землицею с Луканскую подписал Пречистой и собора Архистратигу Михаилу в дом. И служителем пречистинским игумену Мартьяну или по нем ин игумен будет, и священику, и крилошанам, и старцам на кормление. Да и с той же из моей деревни давать на службу, на проскуры з году на год по два пуска жита да по пуску ржи. А живота моего Григорьева естя мерин голуб, да две коровы, обе черны, да три овцы, да теля бело бычок, да хлеба моего тритцать мер: десять мер ржи, а дватцать мер жита. И толко моего всего живота . И яз, Григорей, отказываю тот свой живот после своей смерти весь зятю своему Елизарию и дочери своей Марии. А сорокуустия им дати по моей души игумену Мартияну десять алтын, а отцу моему душевному попу Михаилу восемь алтын, а дьяку и пономарю и проскурнику восмь же алтын. Да и после того зятю моему Елизарию и дочери моей Марии по моей душе памети творити, а достал животов моих все Божии да их зятя моего Елизария и дочери моеи Марии. А иному нет дела до моих животов никому ни в чем, на роду моему, ни племяни. А за тим есми не виноват никому ни чем, разве Богу душею. А на то сведитель Бог и отец мой душевной священик Михайло Григорьев сын. А у духовной сидели люди добрыя Степан Кондратиев сын да Осип Павлов сын Шитиков да Ондрей Макарин сын Кувалда да Григорей Игнатиев сын. А хто взочнет животов моих пытати, и яз с ним сужуся на том свети пред Сп(а)сом. А духовную писал дьяк покровской Ивашко Васильев сын Соломин лета 7000 семдесятого мая в 3 день.