Текст на языке оригинала
Се яз, Яков Иванов сын Шеляпин, отступился есми вотчины государя великого князя земли по своей по купчей грамоты, што есми яз, Яков, ту землю купил у Григорья у Онцыфорова сына на Матигорах в Климовской деревни в трех обжах по половина земли и двора и дворища половина и во всех хоромах оприч избы болшей новой, где Иван Онцыфоров сын живет. Да и земля, што под тою избою да оприч хлева воротного, што от озера да и с прикупною землею, што у Онфилофья у Онтрофьева сына купили, опришно пожен той прикупной земли. И яз, Яков Иванов сын, по своей по купчей грамоте отступился есми тое земли Данилу Конанову сыну горных земель орамых и луговых орамых и пожен, а луговые земли орамые и пожни не разделены у Григорья с Ываном з братом. А горные орамые земли у Григорья с Ываном з братом розделены и розсписаны по их по делным грамотам. А взял есми яз, Яков, у Данила на той земли на посилье себе пять рублев и десять алтын денги вручь сполна. Отступился есми тое земли Данилу со всеми угодьи, што к той земли истарь потягло, куды плуго ходило и коса и серп и топор и со всем без вывета. А не измогл есми яз, Яков, с тое земли дани царевы платить на хлеба посопного никоторых розрубов с волостными людми не измогл есми платити, а в оцыщеньи той земли Данилу яз Яков, по сей, по купчей грамоты. А отступился есми яз, Яков, тое земли Данилу Конанову сыну в дернь без выкупа, и дела мне, Якову, нет по сяков день о той земли по своей и по купчей грамоты да и грамоту купчюю выда есми яз, Яков Данилу на ту землю, што есми ту землю купил к Григорья к Онцыфорова сына, а потуг по сяков день вперед мне, Данилу платити с тое земли всякой земской, да и купчюю грамоту есми яз, Яков, дал Данилу на ту землю. А на то послух Насон Онаньин сын Меншик курополец, да Григорей Онцыфоров сын Поселских, да Аникей Тимофеев сын Истома. А купчую писал николской дьяк матигорской волостной Проня Нефедьев сын лета 7000 семьдесятаго апреля в 6 день.