Се аз Иван Иванов сын Кокошкина дал есми в дом Живоначалныя Троици и пречистыя Богородици и великим чюдотворцам Сергию и Никону и архимариту Памве з братьею или кто по нем архимарит будет у Живоначалныя Троици, свою вотчину деревню Курково да пустошь Клязма в Дмитровском уезде в Каменском стану на реке на Муравке с лесы и с луги и со всякими угодьи по старым межам, куды ходила истари соха и коса и топор. Дал есми вотчину свою стариную по собе и по своих родителех будущих благ наслажения впрок без выкупа вечнаго ради покоя. А тою моею вотчиною владети архимариту з братьею. Да им же пожаловати: велети написати мои родители во вседневнай сенаник. А мне Ивану служити в монастыре за тот вклад. А матери моей Сундулее и брату моему Володимеру Иванову сыну Кокошкину, ни плямяни моему до тое вотчины и до пустошей дела нет, не вступатись им ни во что. Розделили есмя свою вотчину с матерью своей и з братом своим повытно. А та моя вотчина ни продана, ни заложена ни в каких кабалах ни в хлебных ни в денежных, ни в ыныя монастыри по души не отдана. А выляжет на ту мою вотчину которыи крепости, и мне Ивану Иванову сыну Кокошкину та своя вотчина очищати, а архимарита з братьею убытка никоторова не довести. А на то послуси Петр Захарьин сын Руготин да Долмат Иванов сын Алсимов, да Иван Петров сын Катунин. А даную писал Первушка Яковлев сын Дмитреев. Лета 7080-го.