Текст на языке оригинала
Се яз, Федор Иванов сын Онтонова Сухолжина продал есми Тимофею да Басану Селивестровым детем Климентьева на юрмоле на Онаньине в дву деревнях Василиевсково жеребья половину, что купил дядя мой Иван Иванов сын Сухолжин у Василья у Стефанова сына Игнатьева. И яз продал в той купли по той по купчей грамоте, што купил Иван Сухолжин у Василия свою половину, а другую половину тое купли продали дядья мои Остафей и Михайло Ивановы дети Сухолжина и Матфею же и Барсану, двор и дворище, орамыя земли и пожни, и в подскотине и в перевесищах, и в присадах, и в рыбных ловищах, и с присадным островом, по тем землям и со всеми угодьи, што к тем землям истари потягло, где что ни есть. А продал есми и в той купчей грамоте половуну (прим. 1) свою, што купил Иван Сухолжин у Василья у Стефанова, а межи тем землям, и пожням, и всем угодьям по купичим грамотам и по старым межам, куде продали дядья мои Остафей и Михайло по отца своево купчей грамоте и по своей, туде и яз продал, а взял есми у Тимофея и у Барсана на тех землях и на всих угодьях, што в сей купчей пиано, пять рублев денег московская, а пополонка боран. А купил Тимофей и Барсан собе и своим детем в дернь, без выкупа. А ся купчая и отводная по Иванове купчей грамоте Сухолжина, што у Василья купил, и по нашим, што мы продали Остафей и Михайло, и яз, Федор да и с тою есмя купчею грамотою продали, што купил Иван Сухолжин у Василья у Стефанова сына Игнатьева. На то послуси Григорей Левонтьев сын Черново да Михайло Иванов сын Сухолжина, да Мосей Яковлев сын Вахрамеева да Иван Костянтинов сын Вешняк. Купчую писал дьяк унской Ивашко Рагоза Тимофеев сын Шеина лета 7048, марта в 22 день.