Се яз, Тимофей да яз Барсан Селивестровы дети купили есмя собе у Астафья да у Михаила Ивановых детей Сухолжина на Ананьине юрмоле в д(в)у деревнях шестой участок Васильеве трети половина. А то у нас треть Васильева с Федором с Ывановым сыном Онтонова по половинам в дворах и в дворищах, и в орамых землях, и в пожнях, и в скотинах, и в рыбных ловищах, и во всех угодьях тех земель, и в нарьи, и в присаде, и с присадным островом, и в перевесищах, и в ыстоках, и во всех угодьях тех деревень, где што ни есть. И Остафей и Михайло в тех деревнях продали свой участок, а взяли есмя на тех землях на всех угодьях у Тимофея и у Барсана пять рублев денег московская, а пополонка боран. А купили есмя собе и своим детем в дернь без выкупа. А продали есмя и старою купчею грамотою свою половину, што купил отец наш у Василья у Стефанова сына. А межи тем землям и пожням и всем угодьям полтарым межам. А в оцищеньи тем землям Остафей и Михаил Сухолжины. А по сей купчей грамоте Остафей и Михайло те земли и двор и дворище и вси угодья, што в сей купчей писано, отвели. А ся купчая и отводная. На то послуси Филип Яковлев сын Боярин да Терентей Самойлов сын. Купчую писал дьяк унской Ивашко Рагоза Тимофеев сын Шеина лета 7048 марта 9.