Текст на языке оригинала
† Бл(а)гословление от вл(а)д(ы)кы, поклон от посадника Георгия и от тысячкого Андреяна, и от всех стареиших, и от всех мьнших, и от всего Новагорода г(о)с(поди)ноу князю Михаилоу Ярославицю. На семь ти, княже, хр(е)ст целовати к всемоу Новоугородоу, на чемь целовали пьрвии князи, и дед твои, и отьць твои. Новгород ти дьржати по пошлине, како дьржал дед твои и о(те)ць твои. Грамот ти не посоужати. А моужа ти без вины волости не лишити. А бес посадника ти волостии не раздавати, ни соуда ти соудити, ни грамот давати. А волостии ти, княже, новгородьскых своими моужи не дьржати, дьржати ти моужи новгородьскыми; а дар тобе от тех волостии емати. А се волости новгородьскыя: Волок с всеми волостьми, а дьржати ти свои тиоун на половине, а новгородьць на половине в всеи во[ло]сти (Примечание: в ркп. вости) Волочкои; а на Търъжкоу ти, княже, дьржати свои тиоун на своеи части, а новгородьць на своеи части. А се волости новгородьскыя: Бежице, Городьць, Мелеча, Шипино, Егна, Волъгда, Заволочие, Голопьрьмь, Тьре, Пьрьмь, Печера, Югра; а ты волости дьржати ти моужи новгородьскыми. А свинье бити ти, княже, за 60 вьрст около города, а дале коуда комоу годно. А закладников ти не приимати, княже, по всеи волости Новгородьскои, ни княгыни твоеи, ни бояром твоим, ни дворяном твоим. А сел ти не ставити по Новгородьскои волости, ни твоеи княгыни, ни твоим бояром, ни твоим дворяном, ни коупити, ни даромь приимати. А свобод ти не ставити по Новгородьскои волости. А что сел, княже, на Новгородьскои земли твоих, или княгыниных, или бояр твоих, тех сел тобе състоупитися; а коуны емати на них оу истьцев своих, оу кого боудеть кто коупилъ; а земля С(вя)тои Софии к Новоугородоу. А что сел и свобод Дьмитриевых, то дали есме быле Андрею до живота Андреева в хр(е)стьное целование, а потомь Новоугородоу то все; а тобе, княже, в то не въстоупитися. А роубежь ти дати правыи по старомоу роубежю в хр(е)стьное целование, како было при о(т)ци твоемь Ярославе. А на Озвад ти, княже, ездити лете звери гонит. А в Роусоу не ехати, ехати в Роусоу на третьюю зимоу. А в Ладогоу ти, княже, ездити на третиее лето. А осетрьникоу твоемоу ездити в Ладогоу по грамоте о(т)ца твоего, како пошло. А в Вълъгде ти тиоуна не дьржати. А соудиям твоим ездити по волости, коуда пошло, лете с Петрова дни (Примечание: написано под титлом), по пошлине. А что пожень княжих, то князю; а новгородьское Новоугородоу. А вывод ти, княже, в всеи Новгородьскои волости не надобе. А с Соуждальскои земли тобе, княже, новгородца не соудити, ни грамот давати, ни волостии раздавати. А по всеи Соуждальскои земли гостити новгородцю без роубежа. А оу мыта оу новгородца и оу новоторъжца по две векше от воза, и от лодие, и от хмелна короба, и от льняна. А дворяном твоим ходити по пошлине: от князя по пяти коун, а от тиоуна по две коуне. А за Волок ти, княже, своего моужа не слати, продаяти ти дань своя новгородцю. А холопоу и робе на г(о)с(по)даря веры не яти. А в Немечком дворе тобе, княже, търговати нашею братиею; а приставов ти не приставливати; а двора ти не затваряти. А что подеялося доселе межи тобою и твоими моужи Новоугородоу до хр(е)стьного целования, то ти все, княже, отложити и твоим моужем. А твоим соудиям по волости самосоуда не замышляти на людех по Новгородьскои волости. А вязчего не пошло по Новгородьскои волости, то соудиям твоим отложити. А холопа и половника не соудити твоим соудиям без г(о)с(по)даря; соудити князю в Новегороде, тако пошло. И коупцины в силоу не соудити в волости. А кто живеть в Търъжкоу на Новотързькои земли, а к С(вя)т(о)моу Сп(а)соу не тягнеть к Търъжкоу, княземь от(ъ)емъся, а ти поидоуть ис Торъжкоу, коуда им годно. Аже възъидеть к [т]обе (Примечание: первая буква почти стерлась), княже, на моужа обада, томоу ти веры не яти, дати томоу исправа. А оу коупьць повозов не имати, разве ратнои вести. А коли, княже, поедешь в Новгород, тъгда тобе дар емати по постояниямъ; а коли поедешь из Новагорода, тъгда дар не надобе. А холоп или половник забежить в Тферьскоую волость, а тех, княже, выдавати; которыи ли въстворить соуд собе, соудити его в Новегороде. А нелюбие, княже, тобе отложити и от стареиших, и от мьнших, и от всех. На семь, г(о)с(поди)не, на всемь целоуи хр(е)ст при нашеи братии, при послех.