Текст на языке оригинала
Се докончал великыи князь Михаило с владыкою Давыдомь, i с посадникомь, и со всiмь Новымьгородомь, что ся оучинило промежи князя и Новагорода розратье. Что взято в княжи волости в замятню, или оу наместников, iли оу послов, или гостиныи товар, или коупецьскыи, или в церквах, или оу которого боярина, или по всеи волости, то все князь отложилъ; а что взято товара новгородьского, или коупецьского, или гостиного, или по всеи волости Новгородьскои, а того всего Новоугородоу не поминати. А что сел или людии новгородьскы[х] (Примечание: в ркп. новгородьскы) в сю замятню заложилося за князя и за княгыню, или за дети, или за бояров (Примечание: окончание -ов, как кажется, написано по смытому), или села кто купил, коуны емоу имати, а села к Новоугородоу по Фектистове грамоте, что на Тфери докончал. А что [го]ловы (Примечание: в ркп. стерлось, от г сохранилась только вертикальная мачта) поимано по всеи волости Новгородьскои, а те поидоу к Новоугородоу без окоупа. А князю великомоу Михаилоу не наводити на Новъгород, ни бояром его ни про что же, ни гостя роути в Суждальскои земли, нигде же. А за все за то взяти князю оу Новагорода двенадчать тысячи серебра, боуди Андрееве дети, боуди Машко з детми, или Юрьи Калека и вси талщикы; и что взял Федор Юрьевич и Елферии Жидьслаличь оу талщиковъ (Примечание: -алщ- стерлось, прочитано в ультрафиолете) и оу Машка з детми, а то поиде в тоу же двенадчать тысячи серебра. А срок трем тысячам и двема стома взяти князю на Сбор, в низовьскыи весъ; а како възметь князь 3000 и двесте, тако емоу поустити хлеб и всякыи гость. А дроугыи 3000 взяти князю (Примечание: последняя буква прочитана предположительно: имеется только низ петли, но отсутствует вертикальная мачта слева) на Средокрестье, в низовьскыи же вес. А третьии 3000 пояша хопыли к собе, дати им на Вербьницю без 2 сту и без полутрьтиядчати серебра, в низовьскыи же вес. А четвьртыи 3000 взял Федор и Елферии оу талщиков. А что переиде черес срок 4 дни, а в томь князю измены не оучинити. А како князь серебро поемлеть, тако емоу вся таль поустити по целованью. А нелюбье князь отложил от Новагорода, и от Пьскова, и от пригородовъ; а посаднику, и тысяцьскомоу, и всемоу Новоугороду, кто мои недругы мне (Примечание: вписано над строкой) выдал в Торжькоу, темь ся им не мьщати. А Новугородоу княженье мое честно дьржати без обиды; а князю великомоу дьржати Новъгород без обиды, в пошлине. А опять сел князь великыи Михаило на Фектистове грамоте, что доконьчал с владыкою и с послы новгородьскыми на Тфери. А на семь на всемь князь великыи Михаило крест целовал к Новоугороду; а Новъгород к великомоу князю крест целовал по сим грамотам. А исплатить Новъгород то серебро двенадчать тысячи, то великомоу князю грамота изрезати, что докончали на Городке на Волзе, и другая грамота новоторзьская, что в Торжькоу доконьча[ли] (Примечание: в ркп. утрата).