Текст на языке оригинала
Се язь, великии князь Казимир, королевич всеи Литовьскои земли и Жомотскои и многих рускых земль, доконьчал есмь мир вечныи с владыкою новгородскым с Еоуфимьемь, и с посадником с Федором с Олисиевичем, и с тысячькым Семеном с Тимофиевичем и со всим Великим Новымъгородом. А приехале от Новагорода Есиф Васильевич, сын посаднич, а от житьих Тимофии Иванович; с тыми есми мир кончал. А што моих людеи, или литвин, или витблянин, или полочанин, или смол[ня]нин (Примечание: в ркп. смолнин), или с ыных с наших рускых земль, тым путь чист изо всеи моеи отцины, торговати им в Новегороде, бес пакости по старине, а торговати с новгородци. А хто приедет с великого князя товаром, торговати им с новгородчи в Немечком дворе. Такоже и новгородчем изо всеи Новгородскои волости торговати бес пакости по всеи Литовьскои земли. А мне, великому князю Казимиру, королевичу, блюсти новгородча, как и своего литвина. Такоже и новгородчем блюсти литвина, как и своего новгородча. А мне, великому князю Казимиру, королевичу, на Новоторском пути и на всих путех во всеи Новгородскои волости пути не переимати гостя (Примечание: я переправлена из и или н) никакоже, хто поедеть в Новъгород или из Новагорода. А где новгородча в ратном имуть, пустити его с товаром бес пакости; или новгородчи литвина в ратном имуть, пустити его, а ему, право рек, товар свои взяти. Аже взгоном в блазну возмуть новгородское, или человек или лошадь, ехав ис тои волости человеку к воеводе, рек право, свое взяти, а им дати; или черес то село возмуть, или два, то оуже измена, а с нас правда доловь. А межи собою нам будучи в любви, за холоп, за робу, за должник, за розбоиник не стояти ни мне ни вам, и за поручник, и за смердъ: выдати его по исправе. А оучинится пеня гостю новгородскому в Литве, тамо ему и кончати, по княжои правде и по крестному челованью; или оучинится пеня в Новегороде полочанину, или витблянину, или литъвину, или русину с нашего ве[ли]кого (Примечание: в крп. Векого) княженья, концати в Новегороде, по княжои правде и по крестному (Примечание: н перправлена из о) челованью. А рубежь Новугороду с Литвою по старому рубежю земли и воде, и с волочаны, и с витбляны, и с торопчаны. А на Молвятичох взяти ми, князю великому, два рубля, а тиоуну рубль за петровщину; на Куньску възяти мне, князю великому, рубль, а тиоуну полтина; на Березовчи взяти мне, князю великому, полтора рубля да тритчать куничь; на Стержи тритчать куничь да шестьдесят бел, а петровщине рубль; в Мореве сорок куничь да два сорока бел, да петровщине рубль; а в осенине пол рубля; а в Жабне дватчать куничь да сорок бел, да петровьщине (Примечание: ь переправлена из и) рубль, а пиво с перевары, а мед сытити по силе; а на Лопастичох и на Буичох оу чорнокунчов по две куници, да по две беле; а слугам трем по беле; а на Луках нашь (Примечание: н переправлена из о или с) тиоун, а вашь другии: суд им наполъ; а торопечкому тиоуну по новгородскои волости не судити, ни ржевьскому; а в Любокове и в Заклиньи по две куничи да по две беле; а за петровщину сорокъ (Примечание: переправлена из о) белъ; а во Ржеве по две куници да по две беле, а мед по силе сытити с перевары. А тиоуну ездити по переварам в пятинатчати человек, а по чернокунчем такоже в пятинатьчати человек. А в Новгородскои волости не надоби ни что иное Литви, ни на Демяне, ни на Сне, ни на Полонове, не надоби брати черна куна, ни иное ничто же. А кончал яз, великыи князь Казимир, королевич, мир со всим Великым Новымгородом, и с пригороды и со всею волостью с Новгородскою по сеи грамоте. Оже оучинится нелюбовь мне, великому князю (Примечание: н переправлена из недописанной к) Казимиру, королевичу, до Великого Новагорода или Новугороду до мене, великого князя Казимира, или будеть мир нелюб, сослався и грамота отослав, а после грамоты месяць не воеватися; а как месяць изоидет, то же ся воевати. А на сем на всем яз, великии князь, крест человал, Казимир, королевич; такоже и послы новгородскыи Есиф Васильевич, сын посаднич, а от житьих Тимофии Иванович крест человале от всего Великого Новагорода, по любви, в правду, без всякого извита. Литовьскым послом по Новгородскои волости подвод не имати; а новгородскым послом по Литовьскои волости не имати подвод.