Текст на языке оригинала
† Благосл[о]вление (Примечания: здесь и далее в квадратных скобках — в ркп. утрачено, восстановлено по смыслу и по № 1 и 3) от владыкы, поклан[яни]е от посаднiка Михаила, и от тысяцьскаго Кондрата, и от всего Новагорода, и от всех стареиших, и от всех меньших к князю Ярославоу. На семь, княже, целоуи хрест к всемоу Новоугородоу, на цемь то целовали деди, и отци, и отець твои Ярослав. Новъгород ти держати в старине, по пошлине. Что волостии всех новгородьскых, того ти, княже, не держати своими моужи, н дьржати моужи новгородьскыми; а дар имати тобе от тех волостии. А бес посадника тобе волостии не раздавати. А комоу раздаял волости брат твои Александр илi Дмитрии с новгородци, тобе тех волостии без вины не лишати. А что ти, княже, пошло на Торожку и на Волоце тивоун свои дьржати: на своеи чясти дьржати, а новъгородьць на своеи чясти дьржати. А в Бежицах, княже, тобе, ни твоеи княгыни, ни твоим бояром, ни твоим дворяном сел не дьржати, ни коупити, ни даром приимати, и по всеи волости Новгородьскои. А се, княже, воло[с]ти новгородьскые: Волок с всеми волость[м]и, Тържькъ (Примечание: к переправлено из и), Бежице, Городьць Палиць, а то есме дали Иванкови, потом Мелечя, Шипино, Егна, Вологда, Заволоцье, Тре, Перемь, Печера, Югра. А в Роусоу ти, княже, ездити осень, а лете не ездити, ездити на Озвадо звери гонит. А в Ладогоу ти, княже, слати осетрьник и медовара по грамоте отця своего Ярослава. А соуд, княже, отдал Дмитрии с новгородци бежичяном и обонижаном на 3 лета, соудье не слати. А из Бежиць, княже, людии не выводити в свою землю, ни из инои волости новгородьскои, ни грамот им даяти, ни закладников приимати ни княгыни твоеи, ни бояром твоим, ни дворяном твоимъ: ни смерда, ни коупцины. А без вины ти моужа волости не лишити. А грамоты ти, княже, не посоуживати. А пожне, княже, что пошло тобе и твоим моужем, то твое, а что был отъял брат твои Александр пожне, а то ти, княже, не надобе. А что, княже, брат твои Александр деял насилие на Новегороде, а того ся, княже, отстоупи. Дворяном твоим и тивоунимъ (Примечание: так в ркп.) погон имати, како то пошло. А на том ти, княже, на всемь хрест целовати бес перевода, прi наших послехъ; а мы ти ся, господине княже, кланяем. А что, княже, мыт по твоеи земли, и по [и]нои волости, и по всеи Суждальскои земли, а то, княже, имати по 2 векши от лодье, и от воза, и от лну, и от хмелна короба. А дворяном твоим по селом оу коупцев повозов не имати, разве ратнои вести. Тако, княже господине, пошло от дед и от отець, и от твоих и от наших, и от твоего отчя Ярослава.