Текст на языке оригинала
Благословление от владыкы, поклон от посадника Павше, и от всех стареиших, и от всех менших, и от всего Новагорода к господиноу князю Ярославоу. На семь, княже, целоуи хрест к всемоу Новоугородоу, на цемь то целовали деди и отець твои Ярослав. Новгород ти держати в старине, по пошлине. Что волостии всех новгородьскых, тех волостии, княже, не держати ти своими моужи, н держати моужи новгородьскыми; а дар, княже, тобе имати от тех волостии. А бес посадника ти, княже, соуда не соудити, ни волостии раздавати, ни грамот ти даяти. А комоу волости роздаял Дмитрии с новгородци и Александр, брать твои, тех волостии тобе без вины не лишати. А что ти, княже, пошло на Торожкоу и на Волоче: тивоун свои дьржати на своеи чясти, а новгородець на своеи чясти. А в Бежичях тобе, княже, ни твоеи княгыни, ни твоим бояром, ни твоим слоугам сел не держати, ни коупити, ни даром приимати, и по всеи волости Новгородьскои. А се, княже, волости новгородьскые: Волок с всеми волостьми, Торжек, Бежиче, Городець Палиць, Мелечя, Шипино, Егна, Заволочье, Тре, Перемь, Печера, Югра, Вологда. А в Роусоу ти, княже, ездити на третиюю зимоу. А лете, княже, ездити на Озвадо звери гонит. А в Ладогоу, княже, слати осетрьник и медовара по грамоте отца своего Ярослава; а тоу грамотоу, княже, отъял еси, а та грамота, княже, дати ти назад. А в Ладогоу, княже, ездити на третиее лето. А из Бежиць, княже, людии не выводити в свою волость, ни из инои волости новгородьскои, ни грамот им даяти, ни закладников приимати ни твоеи княгыни, ни бояром твоим, ни слоугам твоимъ: ни смерда, ни коупцины. А без вины ти, княже, моужа без вины не лишати волости. А грамот ти не посоужати. А пожне, княже, что твое и твоих моужь пошло, то твое и твоих моужь, а что был отъял брат твои Александр пожне, то ти не надобе. А что, княже, грамоты посоудил еси отца своего и брата своего, а свое грамоты подаял еси на ты грамоты, ты грамоты отъимати (Примечание: конечная и перправлена из ы), а старые оправливати. А что, княже, брат твои Александр деял насилие на Новегороде, того ти ся отступити. А дворяном твоим, како пошло, погон имати: от князя по 5 коун, а от тивоуна по (Примечание: п перепрпавлена из двух других букв — из в или к) 2 коуне. А что, княже, мыт по Соуждальскои земли и в твоеи волости: от воза имати по 2 векши, и от лодье, и от хмелна короба, и от лняна. А дворяном твоим оу коупчев повозов не имати, разве ратнои вести. А свобод ти, ни мыт на Новгородьскои волости не ставити (Примечание: конечная и перправлена из ь). А на Имоволозьском погосте коуны ти имати и на Важаньском. А что еси, княже, отъим оу Кюрили Хотоуниче (Примечание: вписано в оставленное место более крупными буквами, другим пером (скорее всего, и другим почерком)), дал еси попоу святого Михаила, а городискым попом не пошло дани има[ти] (Примечание: в ркп. има) на новгородькомъ (Примечание: так в ркп.) погосте, вдаи опять. А холоп или роба почнеть вадити на господоу, томоу ти веры не яти. А на Низоу, княже, новгородца не соудити, ни дании ти раздавати. А что, къняже, тобе было гнева на посадника и на всь Новгород, то ти, княже, все нелюбье отложити и от мала, и от велика, не мщати ти ни соудомь, ни чим же. А кто почнеть вадити к тобе, томоу ти веры не яти. А про послы, княже, и про коупче новгородьскые, что в Костроме и по иным городомъ (Примечание: третья о переправлена из другой буквы (из недописанного м?)), то, исправив, поусти в Новъгород с товаром. А в Немецьском дворе тобе торговати нашею братиею; а двора ти не затваряти (Примечание: и переправлена из ь); а приставов ти не приста[в]ливати (Примечание: в ркп. присталивати). А про полон, кто кде заточен, или человек, или конь русьскыи и новгородьскыи, то исправи. А село Святои Софии исправи к Святои Софии. А до владыкы, отча нашего, гнева ти не держати. На том, господине, на всемь крест целоуи к всемоу Новоугородоу. А гости нашемоу гостити по Соуждальскои земли без роубежа, по цесареве грамоте. А судье слати на Петров день, тако пошл[о] (Примечание: в ркп. конечная о или недописана, или утрачена). А вывода, ти, княже, межи Соуждальскою землею и Новъмъгородом не чинити. А что закладников за Гюргемь на Торожкоу или за тобою, или за кн[я]гынею (Примечание: в ркп. утрата), или за мужи твоими: кто купець, тот в сто; а кто смерд, а тот потягнеть в свои погостъ; тако пошло Новегороде, отпоустите их проць.