Текст на языке оригинала
Бл(а)гословление от вл(а)д(ы)кы, поклон от посадника Гюргя, и от [ты]сячкого (Примечание: в квадратных скобках — в ркп. утрачено (в начале грамоты утрачено вместе с верхним слоем пергамена, в конце — стерлось и загрязнено)), и от всех стареиших, и от всех мьнших, и о[т всего] Новагорода г(о)с(поди)ноу кн(я)зю Михаилоу. На семь, кн(я)же, целоуи хрьстъ (Примечание: от ь сохранилась только самая нижняя часть) к всемоу Новоугородоу, на чемь целовали деди и о(те)ць твои Ярослав. Новгород ти дьржати в старине, по пошлин[е] (Примечание: возможно, слово было в ркп. недописано: утрата слишком мала для написания даже одной буквы). Что волостии новгородьскых, тех волостии, кн(я)же, не д[е]ржати ти своими моужи, дьржати моужи новгородьскы[ми]; а дар, кн(я)же, тобе емати от тех волостии. А бес посадника ти, кн(я)же, соуда не соудити, ни волостии роздавати, ни грамот даяти. А без вины моужа волости не лишити ти. А что ти, кн(я)же, пошло на Тържькоу и на Волоце: тивоун свои дьржати на своеи части, а новгородца на своеи части. А в Бежичах тобе, кн(я)же, ни твоеи княгыни, ни твоим бояром, ни твоим слоугам сел не дьржати, ни коупити, ни даром приимати, и по всеи волости Новгородьскои. А се, кн(я)же, волости новгородьскыя: Волок с всеми волостьми, Тържьк, Бежице, Городьць Палиць, Мелеча, Шипино, Егна, Заволочие, Тьре, Пьрмь, Печера, Югра, Волъгда. А свинье бити за 60 вьрст от города. А в Роусоу ти, кн(я)же, ездити на третьюю зимоу. А лете ездити на Озвад звери гонит. А в Ладогоу ти, кн(я)же, слати осетрьника и медовара по грамоте деда твоего Ярослава. А ездити тобе, княже, в Ладогоу на третиее лъто. А из Бежиць, кн(я)же, людии не выводити в свою волость, ни из ынои волости новгородьскои, ни грамот им даяти, ни закладников приимати ни твоеи княгыни, ни бояром твоим, ни слоугам твоимъ: ни (Примечание: далее смыто две буквы (возможно, повторное ни)) смерда, ни коупцины. А грамот ти не посоужати. А пожне, что твои (Примечание: конечная и, очевидно, переправлена из е) и твоих моужь пошло, то твое и твоих моужь; а новгородьское Новоугородоу. А дворяном твоим, како пошло, погон емати: от князя по 5 коун, а от тиоу[на] (Примечание: в ркп. тиоу) по 2 коуне. А что, кн(я)же, мыт по Соуждальскои земли и в твоеи волости, от воза имати по 2 векше, и от лодье, и от хмелна короба, и от льняна. А дворяном твоим оу коупьць повозов не емати, разве ратнои вести. А свобод ти, ни мыт на Новгородьскои волости не ставити. А холоп или роба почнеть вадити на господоу, томоу ти веры не яти. А на Низоу тобе, кн(я)же, новгородца не соудити, ни волостии роздавати. А кто почнеть вадити к тобе, томоу ти веры не яти. А в Немечком дворе тобе, кн(я)же, търговати нашею брат(ь)ею; а двора не затваряти; а приставов не приставливати. А гости нашемоу гостити по Соуждальскои земли без роубежа, по ц(е)с(а)р(е)ве грамоте. А соудье слати тобе свое на Петров д(е)нь, тако пошло. А вывода ти, кн(я)же, межю Соуждальскою землею и Новгородьскою не чинити. А что закладников в Търъжкоу или инде, или за тобою, или за княгынею, или за моужи твоими: кто коупьць, поидеть в свое сто; а смерд поидеть в свои погостъ; тако пошло в Новегороде, отпоусти их прочь. А за Волок ти своего моужа не слати, слати новгородца; а тобе серебро емати. А гнева ти, княже, до Новагорода не дьржати ни до одиного ч(е)л(о)в(е)ка. А рядоу в Новгородьскои волости тобе, кн(я)же, и твоим соудиям не посоужати. А самосоуда не замышляти. А старосте ни холопа ни робы без г(оспод)аря твоим соудиям не соудити. А за роубежь из Новгородьскои волости твоим дворяном соуда не водити, [ни] (Примечание: восстановлено по смыслу; в ркп. промежуток между води/ти и соудити составляет 2,5 см, могло поместиться до 5 знаков) соудити. А свобод ти и сел състоупитися. [А] про землю и про [села]: кто оу кого боудеть коупил, знаеть своего истьца про коуны, а земля к С(вя)теи Софии.