Текст на языке оригинала
† А на сем на всем, господине князь великии Борис Олександрович, челуи крест ко всему Великому Новгороду. А старыи, господине князь великии, рубеж земли и воде даи промежи Тферью и Кашином, и Новгородчкои отцине, и Торжком, и Бежичкым Верхом. И князь великии Борис Олександрович дал рубежь земли и воде промежи своего великого княженья Тфери и Кашина, и промежи Новгорочкои (Примечание: ч написано с длинным хвостом, почти как у) отцине, и Новоторжскои земли и воде, и Бежичкои, по великого князя грамоте Ивана Даниловича. А как почелуеть крест князь великии Борис Олександрович к Великому Новгороду, а земли и воде дасть старыи рубеж по великого князя грамоте Ивана Даниловича, ино дати князю великому Борису Олександровичу своего боярина соудьею на рубежь, а Великому Новгороду дати своего боярина судьею на рубеж; а тым судьям судити порубежных людии, татеи и розбоиников, с обе половине, по хрестному целованью. А на кого възговорят из Новгорочкых волостеи на тферьского татя или на розбоиника, а възмолъвят нет, ино ему и потом не быти во тферьскых волостех; а будет, ино его бес суда выдати, по хрестному челованью. А на кого взговорят изо тферьскых волостеи на новгорочкого татя или разбоиника, а възмолвят нет, [и]но (Примечание: в ркп. утрата) ему и потом не быти в новгорочкых волостех и в новоторжскых; а будет, ино его бес суда выдати, по хрестному челов[а]нью (Примечание: в ркп. утрата). А судьи слати князю (Примечание: написано без титла) великому Борису Олександровичу и Великому Новгороду на рубеж черес год. А князю великому Б[о]рису Олександровичу, и его братьи, и его детем, и его княгини, и их бояром земли и воды новгородчкои и новоторжскои не купити, ни даром не приимати, ни закладщиков не держати. А хто почнет новгородцев или новоторжцов во Тфери жити, или во Тферьском княженьи (Примечание: написано без титла), или в Кашини, земля их к Новгороду, а князю великому Борису Олександровичу то не надоби; или хто почнет тферичь жити в Новгороде или в Торжку, земля их князю великому Борису Олександровичу, а Новгороду то не надоби. А имуть чего искати на новгородцех или на новоторжчех, суд с новгородцем в Новгороде, а с новоторжцом в Торжку; или цего имут искати новгородци или новоторжци на тферитине, соуд им во Тфери; а судити с обе половине по хрестному челованью, а посула не взяти с обе половине. А в Русе и в Торжку (Примечание: над Торжку выносная с) имати (Примечание: в ркп. имаати) оу тферичь гостинное по старине; а во Тфери оу новгородцев и оу новоторжцов имати гостинное и мыт по старине. А приведут тферитина с поличним к новгорочкому посаднику или к новоторжкому, судити его по хрестному челованью, а посула не взяти с обе половине; а приведут новгородца или новоторжца с поличним на Тфери к великому князю (Примечание: написано без титла) или к его наместнику, судити его по хрестному челованью, а посула не взяти с обе половине. А где орудье почнет, ту его и концати. А гостю гостити всякому с обе стороне, поуть чист, без рубежа. А ворот ти не затворяти, и всякыи гость пустити в Новгород. А силою ти гостя новгородчкого и новоторжкого во Тферь не переимати. А черес рубежь ти в Новгородчкую волость и в Новоторжъскую дворян и приставов не всылати. А послом новгорочкым, и новгородцем, и новоторжцем ездити сквозе князя великого отцину Бориса Олександровича, путь чист, бес пакости. А холопы, и робы, и беглеци выдати с обе стороне, по исправе и по хрестному челованью. А на том на всем, князь великии Борис Олександрович, челуи, господине, крест к Великому Новгороду по любви, в правду (Примечание: далее конец грамоты приписан другим почерком, размашистым и небрежным). А похоцет князь великии на тои грамоте за то ятися, и Великии (Примечание: в ркп. Велитии) Новгород повелел за то ятися Павлу Федоровичу (Примечание: в ркп. Федодорович(у)); или князь (Примечание: в ркп. ккн(я)зь) великии Борис Олександро[вич] (Примечание: в ркп. недописано) того не похочет (Примечание: в ркп. похочечет), ино Великому Новгороду на Павла не помолвити.