Текст на языке оригинала
Се доконча князь великыи Михаило Олександровичь тферьскыи, прислав своего посла в Новгород Михаила Костянтиновица, с архиепископом новгородьскым с владыкою с Олексеем, с посадником с Юрьем, с тысячьскым с Матфеемь, с всим Новымъгородом. Что ся оучинилось нелюбье князю Михаилу с Новымъгородом, и князь Михаило свое бещестье от Новагорода отложил, а Новгород свое бещестье от князя от Михаила отложил. А князю Михаилу свои наместникы с Торжьку и со всих волостии с новгородьскых свести. А коих новгородцов или новторжан князь Михаило или его бояре привеле к целованью, или на поруку по[да]вале (Примечание: в ркп. повале), или на коих грамоты поимал, с тых князь Михаило целованье снял, и поруку свел, и грамоты отложил. А что послове княжи Михаилове человале крест к Новугороду, с тых Новгород челованье снялъ; а что человале новгоро[д]скыи (Примечание: по-видимому, в ркп. утрачена выносная д) пословы к князю к Михаилу, то челованье князь Михаило снял. А что полону новторского голов, голов новгородскых и новторскых, в отцине князя велика[г]о (Примечание: в ркп. утрата) в Тферьскои волости или инде где, тых всих князю Михаилу и его боярам отпущати без окупа, по хрестному целованию. А что оученился грабежь на Волзе, или инде где, княжим лодьям Михаиловым тферьского, или товар поиман, или головы побиты от новгородцев, то все князь Михаило отложил. А что взял князь Михаило город (Примечание: выносная д обведена другими чернилами и пером (по-видимому, металлическим) Торжок или волости новъгородьскыи, то все Новгород отложил от князя от Михаила. А что товар поиман оу новъгородскых купець и оу новторскых из лодеи рубежом до новторского взятья, тот товар князю Михаилу подавати новгородскым купцам и новторскым все чисто по челованию; а им взяти свои товар, человав. А будя в миру, князю Михаилу тферьскому не ити ратью на Новгород, ни на Новгородскую волость; н[и] (Примечание: в ркп. утрата) Новугороду не ити ратью на Тферь, ни на Тферьскую волость на князя Михаи[л]а (Примечание: в ркп. утрата). А гостю гостити с обе половине без рубежа. А сии мир держати без льсти и без хыт[р]ости (Примечание: в ркп. хытости). А за холоп, за робу, за поручник, за должник, за татя не стояти, с обе половине не стояти. А воде, земли межю Тферью и Торжьком, Кашином, Бежицами старыи рубежь правыи, по старым грамотам. А князь Михаило крест целовал к Новугороду; а Новгород крест целовал к князю Михаилу. А кто на се целованье наступить, на того Бог и Святая Богородица.