Договор князя Дмитрия Ивановича и Новгорода с князем Михаилом Александровичем; Список XV в.; РГАДА. Ф. 135. Отд. 1. Рубр. 2. Д. 3.

Договор князя Дмитрия Ивановича и Новгорода с князем Михаилом Александровичем; Список XV в.; РГАДА. Ф. 135. Отд. 1. Рубр. 2. Д. 3.

Договор князя Дмитрия Ивановича и Новгорода с князем Михаилом Александровичем

Акт

Договор

Список XV в.

29,2–29,5 х 43,5–43,9 см.

1

Кириллица

ДРВ, ч. 8, изд. 1, с. 249–259, № 8; ч. 1, изд. 2, с. 78–86, № 8; Мышкинское изд., т. 5, ч. 9, с. 22–27; СГГД, ч. 1, № 28, с. 46–49; Ростиславич-Савельев, с. 126–135; Аристов, с. 711–716; Самоквасов, с. 157–162; Владимирский-Буданов, с. 9–19; Бахрушин, № 3, с. 98–101; Фарфоровский, с. 260–263; Коваленский, с. 155–157; ДДГ, № 9, с. 25–28.

10.10.2023

[По б]лагословенью (Примечание: в ркп. утрата, восстановлено по смыслу) отца нашего Алексия, митрополита всея Руси, на сем, брате молодшии князь великии Михаило Олекса[ндр]ович (Примечание: в ркп. утрата, восстановлено по смыслу), целуи ко мне крест, к брату стареишему князю великому Дмитрию Ивановичю, и к моему брату князю Володимеру Андреевичю и к нашеи вотчине к Великому Новугороду, и за свои дети и за свои братаничи. Имети ти мене собе братом стареишим, а князя Володимера, брата моего, братом. А добра ти нам хотети во всем, везде, без хитрости. А што ти слыша ото крестьянина или от поганина о нашем добре или о лисе, а то ти нам поведати в правду, по целованью, без хитрости. А князи велиции крестьяньстии и ярославьстии с нами один человек. А их ти не обидети. А имешь их обидети, нам, дозря их правды, боронитися с ниме от тобе с одиного. А имут тобе обидети, нам, дозря твоие правды, боронитися с тобою от них с одиного. А где ми буде, брате, поити на рать, или моему брату князю Володимеру Ондреевичю, всести ти с нами самому на конь без хитр[о]сти (Примечание: в ркп. утрата). А пошлем воевод, и тобе и своих воевод послати. А вотчины ти нашие Москвы, и всего великого княженья, и Новагорода Великого блюсти, а не обидети. А вотчины ти нашие Москвы, и всего великого княженья, и Новагорода Великого под нами не искати, и до живота, и твоим детем, и твоим братаничем. А людии ти наших московьских, и всего великого княженья, и Новагорода Великого, и новоторъжьских блюсти, а не обидети, как и своих. А закладнеи ти в нашеи вотчине, в великом княженьи, не держати, ни грамот не давати. А имут нас сваживати татарове и имут давати тобе нашу вотчину, великое княженье, и тобе ся не имати, ни до живота. А имут давати нам твою вотчину Тферь, и нам ся тако же не имати, и до живота. А в Кашин ти ся не въступати, и что потягло х Кашину, ведает то вотчичь князь Василеи. Ни выходом не надобе тобе ко Тфери Кашину (Примечание: вписано над строкой) тянути. А его ти не обидети. А имешь его обидети, мне его от тобе боронити. А что еси изъимал бояр или слуг и людеи кашинских да подавал на поруку, с тех ти порука свести, а их отпустити, а кому чего на них искати, ино тому суд. А жити нам, брате, по сеи грамоте. А с татары оже будет нам мир, по думе. А будет нам дати выход, по думе же, а будет не дати, по думе же. А поидут на нас татарове или на тебе, битися нам и тобе с одиного всем противу их. Или мы поидем на них, и тобе с нами с одиного поити на них. А к Ольерду ти и к его братьи и к его детем и к его братаничем целованье сложити. А поидут на нас литва или на смоленьского на князя на великого или на кого на нашю братью на князеи, нам ся их боронити, а тобе с нами всим с одиного. Или поидут на тобе, и нам тако же по тобе помагати и боронитися всим с одиного. А в Рокитну ти ся не въступати, что потягло ко княженью к великому. А что еси целовал к нам наперед сего, что будет на ком не взято на нятцех или на их поручницех княженья великого, или нятци не попущаны, или порука не сведена, а что ся будет не оуправило по тому целованью, что же будет взято опосле того на нятцех или на поручницех, или порука не сведена, взятое все отъдати по тому целованью, а с поручников порука свести, а нятци попущати. А что еси, буда с нами в целованьи или сложа целованье, а кого будешь бояр наших и слуг и людеи московьских и княженья великого, или что еси пограбил, или что оу людеи поимано, ты или твои бояре, или людеи пограбили и павозки, бояр ти и людеи и слуг попущати, а что грабежь или что с людеи поимано и из лодеи и ис павозков товар поиман, то ти все отъдати и твоим бояром по исправе. А не будет исправы, ини возмут по целованью. А отъдати ти все по Семене дни за неделю. А хто будет со мною не был на рати, а оу кого будет что взято, а приедут к тобе, а тым ти тако же отдати по исправе. А как есми стал под городом под Тферью до Семеня дни за месяц, что будешь оу мене взял воинои в тот месяць, тому всему межи нас погреб (Примечание: р переправлена из б). А как еси к нам сложил целованье, а что мы оу тобе поимали и повоевали, а тому всему межи нас погреб. А в Новым ти городом и с Торъжком жити в старине и в миру. А рубежь ти держати с Великим Новымгородом и с Торжьком и з пригороды, земли и воды, по старине, как то было при нашем деде при великом князи Иване и при нашем дяди при великом князи при Семени и при моем отци при великом князи при Иване. А закладнеи ти в Новегороде в Великом и в Торжку и в пригородах не держати, ни грамот не давати. А хто имет бояр или слуг Новагорода Великого и Торжку и ис пригородеи служити тобе, а что их села или земли и воды, то ведает Великии Новъгород, а ты бояром и слугам не надобе. Или потом кто приедет к тобе служити из Новагорода Великого и ис Торжку и ис пригородеи, а тым тако же не надобе села их и земли и воды, то ведает Новъгород Великии. А что еси поимал в Торжку церковное, колоколы, книги, кузнь, что будет оу тобе или оу твоих бояр или в твоеи вотчине, то ти все подавати по целованью. А что еси поимал в Торжку воиною или грабежем, или что с людеи еси поимал и по волостем опосле нашего целованья (Примечание: далее, возможно, пропущено на) святого апостола Петра, то ти дати и твоим бояром по исправе. А не будет исправы, ине возмут по целованью. А что еси целовал к нам наперед сего, что будет на ком не взято, на нятцех или на поручницех, или нятци не попущаны, или порука свести с новгородцев и с новоторжан и с пригородеи, а то ся будет не оуправило по тому целованью, а что будет взято на нятцех опосле того и на поручницех или порука не сведена, ино взятое отъдати по тому целованью, а с поручников порука свести, а нятци ти попущати, которыи оу тобе и оу твоих бояр и оу слуг или оу людеи в твоеи вотчине. А как еси взял Торжек, а кто ти ся будет продал пословицею новоторжан одерень, или будешь серебро на ком дал пословицею, тех ти отпустити по целованью, а грамоты дерноватыи подрати. А что еси привел нооугородцев и новоторжцев к целованью, а то целованье доловь. А имут чего искати тферичи на нооугородци и на новоторжьци, суд ему в Новегороде в Великом или в Торжку. А имут чего искати нооугородци на тферичах, суд им во Тфери. А судити с обе половины, по целованью. А грамот суженых не посужати. А гостем и торговцем Новагорода Великого и Торжку и с пригородеи дати ти путь чист без рубежа сквозе Тферь и Тферьскии волости. А мытов ти новых и пошлин не замышляти. А мыта ти имати и пошлины по старине оу новгородцев и оу новоторъжцев. А буда с Новымгородом в миру, за холопа, за поручника, за робу, за татя, за розбоиника, за должника не стояти с обе половины. А кто бояр и слуг отъехал (Примечание: конечная выносная л переправлена из в) от нас к тобе или от тобе к нам, а села их в нашеи вотчине, в великом княженьи, или в твоеи вотчине, во Тфери, в ты села нам и тобе не въступатися. А что Ивановы села Васильевича и Некоматовы, а в ты села тобе ся не въступати, а им не надобе, те села мне. А бояром и слугам волным воля. А кто будет, служа нам, князем, а вшол в каково дело, а того поискав своим князем, а того своим судьям опчим не судити. А кто служит нам или тобе, а живет в нашеи вотчине, в великом княженьи, или в твоеи вотчине во Тфери, и на тых нам взяти дань, как на своих, по целованью, без хитрости. А на полных холопех не взяти, на которых ключники целуют. А судом и данью потянути по земле и по воде. А что ся оучинит межи нас, князеи, каково дело, ино съедутся бояре наши на рубежь да межи нас поговорят. А не оуговорятся, ини едут на третии, на князя на великого на Ольга. На кого помолвит, виноватыи перед правым поклонится, а взятое отъдаст. А чьи судьи на третии не поедут или на кого третии помолвит, ан взятого не отдаст, то правому отняти, а то ему не в-ызмену. А целованья не сложити и до живота. А всему обидному делу межи нас суд вопчии от первого нашего целованья, от положенья вериг святого апостола Петра. А о чем судьи наши вопчии сопрутся, ини едут на третии, на князя великого на Ольга. А нам, князем, в суд в вопчии не въступатися, ведают то те, на ком есме положили (Примечание: далее зачеркнуто А нам, кн(я)зем, в суд вопчии не въступатися, ведают). А вывода и рубежа межи себе не замышляти. А хто замыслит рубежь, рубежника по исправе выдати. А суженого не посужати. Суженое, положеное, даное, поручное, холопу, робе суд от века. Холопа, робу, татя, розбоиника, душегубца выдати по исправе. А мыта ти держати и пошлины имати по старои пошлине оу наших гостеи и оу торговцев. А путь им дати чист, как то было при нашем деде при великом князи при Иване и при нашем дяди при великом князи при Семене и при моем отци при великом князи при Иване. А мытов ти новых и пошлин не замышляти. А почнут твои искати перед нас или наши перед тебе или пред наши наместници или перед волостели, хоженого в городе алтын, а на правду два, а далнии езд веръста по резане, а на правду въдвое. А хто от нас пригонится в твою вотчину за холопом или за должником, а изымает сам, а без пристава, да поставит перед тобою или перед наместники или перед волостели, в том вины нет. А имет с ким холоп его тягатися, а не будет по нем поруки, ино холопа обвинити да выдати осподарю, а з головы дати пошьлины гривна (Примечание: а переправлена из ы), а с семьи четверть. А на сем на всем, брате молодшии князь великии Михаило Олександрович, целуи ко мне крест, к брату к стареишему князю великому к Дмитрию Ивановичю, к моему брату князю Володимеру Ондреевичю и к нашеи вотчине к Великому Новугороду, и за свои дети и за свои братаничи, по любви, в правду, безо всякие хитрости. А сии список с грамоты с крестнои с тферьскои.

1401-09-01

XV в.