Текст на языке оригинала
Се приехали ко мне, к великому князю Дмитрею Ивановичу всеа Руси, от отца моего владыки Олексея, и от посадника Юрья, от тысятцково Олисея, i ото всего Новагорода Ивано посадник, Василеи Өедоров, Иван Борисов, а от черных людеи Воислав Попович, Василеи Огафонов. Кончал есм с своими мужи в одиначтво, целовали есмы крест с своим братом со князем с Володимером Андреевичем; а на том к нам целовали крест Иван посадник, Василеи Федоров, Иван Борисов, Воислав Попович, Василеи Огафонов; на том целовати крест ко мне, ко князю к великому к Дмитрею Ивановичу всея Руси, и к моему брату ко князю к Володимеру в одиначство всему Новугороду. Аж будет обида со князми литовскiми или с тферьскимъ (Примечание: конечный ъ переправлен из и) князем с Михаилом, Новоугороду всести на конь со мною, со князем с великим, и с моим братом со князем с Володимером с одного; а коли будет мне, великому князю Дмитрею Ивановичу всея Руси, и моему брату князю Володимеру всести на конь на князя на литовского или на тферьского на князя на Михаила, мне, князю великому, самому быти в Новегороде, а любо брата ми послати князя Володимера в Новгород в[с]ести (Примечание: в ркп. вести). Или будет обида Новугороду с литовским князем, или с тферьским князем с Михаилом, или с Немци, мне, князю велiкому Дмитрею Ивановичу всеа Руси, и моему брату князю Володимеру всести по Новегороде с одного, по целованью. А доколе ся Новъгород с литовским князем и со тферьским князем Михаилом не умирит, или с Немци, мне князю великому, и моему брату князю Володимеру Новагорода не метати; любо ми самому быти князю великому в Новегороде или брата пошлю, доколе Новъгород умирю, а быти ми в Новегороде или брата пошлю. А поидет на нас рать, ехати ми от вас, или брату моему, без хитрости, а то нам не в ызмену. А княженье вы великое мое держати честно и грозно, без обиды; а мне, князю великому Дмитрею Ивановичу всея Руси, держати Новъгород в старине, без обиды.