Текст на языке оригинала
По благословенiю преосвященнаго архиепископа Великого Новагорода и Пьскова владыки Еоуфимiа, от посадника ноугородского Ивана Лукинича, от тысетского ноугородского Василiа Пантелеевича, и от всего Великого Новагорода. Се приехали послове к великому князю Василiю Василiевичу всея Руси и к великому князю Ивану Василiевичу всея Руси от Великого Новагорода посадник ноугородскыи Григореи Данилович, посадник ноугородскыи Федор Яковлич, посадник ноугородскыи Василеи Степанович, тысятскои ноугородскыи Яков Иванович, тысятскыи ноугородскыи Васили Пантелеевич, а от житьих Офонас Микулич, Иван Юрiевич, Яков Иванович, Еремеи Кузмич, Василеи Захарьинич и докончали мир по крестным грамотам со князем с великим с Василiем с Василiеви[чем] (Примечание: последние буквы заклеены) и со князем великим Иваном Василiевичем. Как целовал князь великыи Ондреи, и князь великыи Иван, и князь великыи Семен, и прадед твои князь великыи Иван, и дед твои князь великыи Дмитрiи, и отець твои князь великыи Василеи, целуи, господине князь великыи Василеи Василiевич и князь великыи Иван Василiевич, по тому ж крест ко всему Великому Ноугороду. Новъгород держати вам в старине, по пошлине, без обиды; а нам, мужем ноугородцем, княженiе ваше держати честно и грозно, без обиды. А пошлин ваших, князеи великих, не таити, по целованiю. А что волостеи ноугородцких всех, вам не держати своими мужи, держати мужи ноугородцкими, и дар имати от тех волостеи. А без посадника вам, князи, суда не судити, ни волостеи роздавати, ни грамот давати. А что вам пошлiна в Торжку и на Волоце: тиун свои держати на своеи части, а ноугородцом на своеи части. А в Бежыцах вам, князи великыи, ни вашим княгиням, ни вашим бояром, ни вашим слугам сел не держати, ни купити, ни даром не приимати, по всеи волости Ноугородцкои. А се вы волости (Примечание: первоначально было волостели; -ел- затерто) ноугородцкiе: Волок со всеми волостьми, Торжок, Бежици, Городець Палець, Шипино, Мелеца, Егна, Заволочье, Тирь, Пермь, Печера, Югра, Вологда. А в Русу вам, князи, ездити на третiю зиму. А лете ездити на Взвад звери гонити. А в Ладогу вам слати осетреникы и медовары, по старым грамотам по крестным. А в Ладогу вам, князи, ездити на третiее лето. А из Бежиць вам, князи, не выводити людеи в свою волость, ни из ыных волостеи ноугородцкых, ни грамот давати, ни закладнеи не держати ни приимати, ни вашим княгиням, ни вашим бояром (Примечание: далее, вероятно, пропущено ни смерда), ни купчины. А без вины вам, князи, мужа волости не лишити, ни грамот не посужати. А пожни, князи, ваши и ваших мужеи, то ваши и ваших мужеи; а что пожни ноугородскыи, а то к Ноугороду, как пошло. А дворяном вашим, как пошло, погон имати: от князя по пяти кун, а от тиуна по две куны. А что мыт по Суздалскои земле в вашеи волости: от воза имати по две векши, и от лодьи, и от хмелна короба, и ото лняна. А дворяном вашим у купцов повоза не имати, развее ратные вести. А слобод и сел, князи великiи, съступилися Великому Ноугороду; на Ноугородцкои земле сел не ставити. А на Имоволожском погосте куны имати. А холоп или роба имет на господу вадити, тому вам веры не няти. Ни на Низу ноугородца не судити, ни дани роздавати, ни приставов вам не всылати во всю волость Ноугородцкую, с Низу не всылати. А что вам, князи великыи, гнев на владыку, и на посадника, и на тысецкого, и на весь Новъгород, то вам, князи великии, нелюбiе отложити. А хто вам почнет вадити, а тому веры не няти. А про послы и про купци ноугородцкыи, тех вам не приимати. А в Немецком дворе торговати нашеи братьи ноугородцем. А двора вам не затворяти, ни приставов не приставливати. А на том вам, князи великыи, крест целовати ко всему Великому Ноугороду. А гостем гостити без рубежа, по цесареве грамоте. А судеи слати по волостем на Петров день, как пошло. А вывода межи Суздалскои земли и Ноугородцкои не чинити. А закладнеи вам, князи великыи, и вашим княгиням, ни вашим бояром в Торжку не держати, ни во всеи волости Ноугородцкои: а купець поидет во сто, а смерд потянет в свои потуг, как пошло, к Ноугороду. А на том на всем, князь великыи Василеи Василiевич и князь великыи Иван Василiевич, целуите крест ко всему Великому Ноугороду, безо всякого извета; такоже и посадник, и тысяцкыи, и весь Великои Новъгород, целуите крест к великому князю Василiю Василiевичу всея Руси, и к великому князю Ивану Василиевичу всея Руси, по любви в правду, безо всякои хитрости.