Договор великого князя литовского Казимира с Псковом о мире; 1440 г.; AGAD. Perg. 7363.

Договор великого князя литовского Казимира с Псковом о мире; 1440 г.; AGAD. Perg. 7363.

Договор великого князя литовского Казимира с Псковом о мире

Акт

Договор

Следы прикрепления, по-видимому, двух печатей — отверстия и красный шелковый шнурок от первой печати с привязанным к нему зеленым шелковым шнурком (возможно, от второй печати).

33х19 см.

1

Кириллица

Сборник Муханова. М., 1836. № 2. С. 2–3. 3-я паг.; Сборник Муханова. 2-е изд., доп. СПб., 1866. № 2. С. 2–3. 3-я паг. (по списку 2); АЗР. СПб., 1846. Т. 1. № 38. С. 51–52 (по списку 1); Источники русской истории. Русь допетровская: пособие для старших классов средних учебных заведений и для самообразования / Сост. С.В. Фарфоровский. СПб.; М., 1913. С. 133–135 (по АЗР); ГВНП, № 335, с. 321–322 (по списку 1); Литовская Метрика. Книга записей 5. Вильнюс, 1993, № 129, с. 246 (по списку 1); Бычкова М.Е. Договор 1440 г. между Псковом и Великим княжеством Литовским. // Вестник РГГУ, 2009, № 4, с. 234–237 (по подл.; текст подготовлен А.А.Бондаренко и О.И.Хоруженко).

Был сложен в 3 раза по горизонтали и в 3 раза по вертикали. Низ грамоты высотой около 4 см подогнут.

23.10.2023

+ Се яз, великии князь Казимир королевич, и с своею братьею кончали есмо мир со Псковом. А приехали к нам со Пскова Ларион Селивестров, сын посаднич, Стефан Аристович, а Лука Михаилович, и добили нам челом от Пскова, и с тыми есмо мир кончали. А кончали есмо так. Што же послу из нашое земли, из Литовское, и гостю, — или лях, или русин, или полочанин, или видблянин или смолнянин, — тым путь чист изо всее моее отчины во Псковьскую землю. А гостю торговати во Пскове без пакости по старои пошлине со всяким гостем; також и псковичом послу и гостю, изо всее отчины Псковское, тым всим путь чист во всю мою отчину, в Литовскую з[ем]лю (Примечание: в ркп. утрачено; здесь и далее в квадратных скобках — восстановлено по смыслу и по списку 1). А гостю торговати во всеи Литовскои земли по старине без пакости, по старои пошлине, со всяким гостем. Так ж и послу псковскому, кого коли пошлют ко князю к великому к московскому на Москву, путь чист черес нашю отчину, на Смолнеск там ехати и назад отъехати, коли мы, велики князь Казимир, будем со князем с великим с московским в любви. А мне, великому князю Казимиру, блюсти псковитина, как и своего литвина; також и псковичом блюсти литвина, как и своего псковитина. А межи собою будуче в любви, за холопа, за робу, за должника, за поручника, за смерда, за татя, за розбоиника не стояти ни мне, ни вам, а выдати по исправе. А обидным делом оуложили есмо рок: которыи будут оучинилися от великого князя Витовтовы смерти до сих мест, тым делом на обе стороне суд и справу [у]чинити; а которыи будут пени оучинились перво великого князя Витовтовы смерти, или пожжено и силно пограблено, или головы побиты и иные пак дела, то есмо все [на] обе стороне отложили, того не надобе искати ни нашим на псковичох, ни псковичом на наших. Аже оучинится пеня в Литве гостю псковскому, кончати по великого князя правде и по целованiю. Аже оучинится пеня нашим, или литвину, или полочанину, или видбляном, или смолняном во Пскове, кончати по псковскои правде и по целованью. А рубеж воде и земли со Псковом мне, великому князю, а то нам стары рубеж. А скончал велики князь мир со всем Псковом, и со всеми пригороды Псковскыми, и со всею волостью Псковскою по сеи грамоте. Аж оучинится нелюбов мне, великому князю, до Пскова, и мне, великому князю, тую грамоту крестную не слат[и] ни на Москву ко [князю] к великому Василью, ни к Новугороду, но положити мне т[ую г]рамоту крестную во Пск[ове]; а от того дни, как грамота положена, олиж м[е]с[ецъ] п[рои]де[т], 4 недели, то воев[ати. Так] ж аж оучинится псков[и]чом нелюбов со мною, с великим князе[м] Казимиром, и псковичом грамота крестна положити в Вилне; а от того д[ни, как г]рамота положена, олеж [месец пр]оидет, 4 недели, тож воевати. А на сем на всем яз, велики князь Казимир, крест целовал; также и послове псковские крест целовали от всего Пскова, по пр[авде], без всяко[г]о извета. А псан в Вилне месяца декеврiа в 30 день [по]д леты Рожества Господа нашего Iсуса Христова 1000 лета 440 лета индикта 4.

1440-12-30

месяца декеврiа в 30 день [по]д леты Рожества Господа нашего Iсуса Христова 1000 лета 440 лета индикта 4

1440

1440

XV в.