Текст на языке оригинала
Се приехаша послови немечкыи въ Великии Новгород от князя от местеря Инци Винки, и от пискупа юрьевьского Олфромея, и от посадниковъ юрьевьскых, и от ратмановъ к осподиноу преосвященномоу архиепископоу Великого Новгорода владыкы Еоуфимью, и князю новгородчкомоу Олександроу Васильевичу, и к посадникоу новгородчкомоу Есифоу Григорьевичу, и къ старымъ посадникомъ, и к тысячкому новгородчкому Карпе Савиничу, и къ старым тысячкым, и ко всему Великому Новугороду Инца да Игнатъ, ратманинъ, Индрикъ, толкъ княжь местеревъ, и Яковъ, пискупль бояринъ. И взяша перемирье от князя от местеря с Великимъ Новымгородом от сего сбороу за месяць по Рожестве Святеи Богородици, а от того месяца по Рожестве (Примечание: в ркп. РожР(о)ж(е)стве) Святеи Богородици на пять годъ. А земли и воды роубежь Великомоу Новгороду съ княземъ местеремъ риским Инцеи Винки от Чючкого озера стерженемъ Норове реке прямо в Солоное море, по старымъ грамотам по крестнымъ и по крестному челованью. А Великому Новоугородоу ни новгородчкым людемъ чересъ рубежь, чересъ стержень Норове реке, не вступатися въ княжю местеревоу половиноу, въ левоую стороноу Норове реке; такоже князю местерю ни его людемъ чересъ рубежь, чересъ стержень Норове реке, не вступатися в новгородчкоую половину, в правую стороноу Норове реке, ни во что же. А на семъ мироу соркоша срокъ быти съездоу на Норове на реке на пошломъ месте сего лета за две недели по Ивани дни. А на томъ съезде на Норове на реке быти князю местерю самому и его коумендеремъ, честнымъ людемъ, в двоу сотъ человекъ; а от Великого Новгорода быти на тыи срок на томе (Примечание: так в ркп.) съезде на Норове на реке князю новгородчкомоу и бояром новгородчкым, честнымъ людем, в двоу сотъ человекъ. А на томъ съезде князю местерю и его кумендеремъ дати исправа Великому Новгороду всякимъ обидным делам, и коупечкым товаром, и нятчомъ на обе половине, по крестному челованью. А князю новгородчкомоу и бояром новгородчкымъ, честнымъ людем, на том съезде князю местерю дати исправа всимъ обидным деламъ, и коупечкымъ товаром, и нятцом на обе половине, по крестному челованью. А приехати имъ на тои съездъ и розъехатися доброволно, безо всякои пакости, по сему крестному челованью. А посломъ новгородчкым, и гостемъ, и коупчомъ новгорочкым ездити къ князю местерю и по его городомъ и по его державе, поуть имъ чистъ, и горою и водою, а товаръ имъ всякии купити и продати безъ вывета и без роубежа, по старине и по семоу крестномоу челованью. Такоже княжимъ местеревымъ посломъ, и гостемъ, и коупчомъ ездити въ Великии Новгород и по Новгородчкои отчине, поуть имъ чистъ, и горою и водою, а товаръ имъ всякии и коупити и продати безъ вывета и без роубежа, по старине и по семоу крестномоу челованью. А будет каково дело въ Великомъ Новегороде немциноу до новгородца, или новгородцю до немцина в местереве земли и въ его городехъ, ино том[о]у (Примечание: в ркп. потерто и запачкано, надежно читаются лишь буквы том--; у Ширрена томъ, в LECUB тому; предпочтительно прочтение LECUB, т. к. в междустрочном пространстве виден «хвост» у) соудъ на обе половине, а посоуловъ не имати с обе половине, бес хитрости, по крестномоу челованью. А Великому Новгороду блюсти немцина въ своеи земли, как и своего новгородца; а князю местерю и его коумендеремъ въ своеи земли блюсти новгоро[д]ца (Примечание: в ркп. новгороца), как и своего немцина, на обе половине, бес хитрости, по крестному челованью. А сеи миръ князю местерю Инци Винки с Великим Новымгородомъ, а Великому Новгороду с княземъ местеремъ держати имъ крепко, бес хитрости, на обе половине, по крестному челованью. А на сеи грамоте человаша крестъ князю местерю посадникъ Великого Новгорода Есифъ Григорьевич, тысячкыи Великого Новагорода Карпа Савинич за весь Великии Новгород, и печати свои привесиша к сеи грамоте. Такоже и послы немечкыи человаша крестъ к Великому Новгороду на сеи грамоте от князя от местеря, Инца да Игнатъ, ратманинъ, и княжии толкъ местеревъ Индрикъ, и Яковъ, пискупль бояринъ, и печати свои привесиша к сеи грамоте. А как пошлет Великии Новгород своего посла сеи зиме князю местерю, и князю местерю Инци Винки на сеи грамоте самомоу крестъ (Примечание: в ркп. кртъ без титла) человати перед новгородчкым послом за вси свои городы и за всю свою державоу, и печать своя привесити князю местерю к сеи грамоте (Примечание: в немецком тексте далее дата: В год господень 1448 во вторник перед воскресением четвертой недели поста)