Текст на языке оригинала
+ Се приехаша послове Великии Новъгород от местеря Селивестра Гостела, кумендерь велеядьчкыи, и судья ругодивескеи Еремеи своими други в Великии Новъгород князю Костянтину Дмитриевичу, и ко археепископу новгородчкому владыче Семеону, к посаднику, и к тысячкому и ко всему Великому Новугороду. Соркоша срок мясное заговенье, чо стати местерю на тот срок на Нарове на реке, а оученить ему исправа земли и воде и обидным деламъ всяким с обе стороны. И князе великии Васелии Дметриевичь и князе Костянтин Дмитриевич и археепископъ новгородчкыи владыка Семеонъ, посадник новгородчкыи Васелии Микитинеч, и тысячкыи новгородчкыи Кузма Терентеевич, и весь огосподинъ Великии Новъгород послаша на съездъ с местерем князя великого намеснека князя Федора Патракеевича, посадника новгородчкого Васелея Есефовича, Якова Дметриевича, посадника новгородчкого Офоноса Федоровича, Мехаила Юрьевича, Наоума Ивановича к местерю на съездъ на Нарову на реку. Съехавсе с местерем князя великого намеснек Василея Дметриевича князе Федоръ Патракеевич, посадник новгородчкыи Васелии Есепович, Яковъ Дметриевич, посадникъ новгородчкыи Офоносъ Федорович, Мехаила Юрьевич, Наоумъ Иванович на Нарове на реке и покончяху с местерем с рескемъ с Селивестром миръ. Земли и воде старыи рубеж, Норове реке стержьнь от Чючкого озера стерьжнем и до моря по старым грамотам по княжимъ. А купечкем делам и обидным делам от сучта местерева скаферьва, что былъ сучетъ с новгородче, а тому исправа оучинить с обе стороны по хрестному челованею. А гостю гостити новгородчкому по местереве земли и по местеревым городам, путь чистъ, и горою и водою, а купити имъ и продати товаръ всякеи без вывета и безъ рубежа; такоже и немечкому гостю гостити по новгородчкои отцине, путь ему чистъ, и горою и водою, а торговати ему всяким товаром без вывета и без рубежа. А что будет новгородчкого товара поиманъ, где бь не был, а будет за местерем или оу его кумендерев или оу [е]го (Примечание: в ркп. го, исправлено по смыслу) земли что будет, а то доведаютче (Примечание: возможно, следует читать доведаетче) местерь или его кумендери новгородчкого товара в своеи земли, а то ему отдати, по хрестному челованью; а что будет немечкого товара в Новгородчкои волости, а что доведаютче (Примечание: возможно, следует читать доведаетче (либо первоначально написанная е была переправлена на ю)) посадник (Примечание: конечная выносная к прочитана предположительно) тысячкеи, а то имъ отдати. А кому до кого орудье, немчену до новгородчя, а новгородчю до немчена, а тому суд с обе половины, по хрестному челованью; а с обе половины посуловъ не имати. А на всемъ на том хрестъ человалъ местерь Селивестръ рискеи, Валеравене ламъмаскалка, велеядьчкеи кумендерь Гостила, колыванескеи кумендерь Тимофии, кескеи судья Иване, ругодивескеи судья Еремеи за себя и за все свои пригороды. А от Великого Новагорода хрестъ человалъ князя великого намеснек Васелея Дмитриевича князе Федоръ Патракеевич, посадник новгородчкыи Васели Есефович, Яковъ Дмитриевич, посадник новгородчкеи Офоносъ Федорович, Михаила Юрьевич, Наоумъ Иванович за Велики Новъгород и за все свои пригороды. А по сему челованью кому ж знать своя половина. А сеи миръ имъ держати крепкъ на обе половины, по хрестному челованею, бес хетрости.