Текст на языке оригинала
Се срядися Василии Федорове и его дети, и его братане Олександрове дети, Мартемьяне, и Иване, и Ондреяне, и Якове с посадником с новгороцкым с Ываном с Даниловицом про учясток дяде своего, про Ондреев, что купил посадник Иван Даниловиць у игумена Святого Спаса и у всих церенцев учясток Ондреев, дяде их, за Волоком в Соломбале Яковцев остров и Карпцев остров, и в Соломбале, что в Соломбале напол, и в Ыжме, что с Федором напол, и в Лодме, что с Федором напол, и в Уне; и в солоных местех в отцине его четвертая чясть, и в лесе и в воде в отцине его четвертая чясть. И взя посадник Иван Даниловиць на том у Василья и у его братанов, у Ол[е]ксандровыхъ (Примечание: буква утрачена при обрезке грамоты, видна лишь маленькая часть) детеи, на Ондрееве учястке в Соломбале, чим Ондреи володеле, сто рублев, что купил посадник Иван Даниловиць у черенцев Святого Спаса. А боле потом не надоби посаднику Ивану Даниловицю ни черенцям Святого Спаса въступатис[я] (Примечание: возможно, конечная я или ь утрачена при обрезке грамоты) в Соломбале за Волоком в Ондреев учясток. А что ряднеи грамоте у Ивана у посадника с Васильем, а те грамоте посадник Иван подраше. А что грамоту взял посадник Иван бесудную на Олександра з детми и на Василья, а ту грамоту посадник Иван подраше. А что пожня Латиперть, а та пожня знати Ивану по своеи исправе, а Василью и его братанам, Олександровым детем, положити свои исправе. А потом не надоби посаднику Ивану Даниловицю, ни игумену Святого Спаса с Хутина, ни черенцям до Василья, (Примечание: от и сохранилась только левая мачта) ни до его детеи, ни до его братанов, до Олександровых детеи, в том орудьи, в Иванове купле в посадници, ничто же; ни Василью, ни его детем, ни его братанам, Олександровым детем, не надоби до посадника до Ивана до Даниловиця, ни до игумена Святого Спаса с Хутина, ни до церенцов в том орудьи ничто же. А на то рядце с обе половине: тысяцкыи Олександр Игнатьевиць, Яков Дм[и]триевиць, (Примечание: от и сохранилась только левая мачта ) Иван Дмитриевиць, Сава Ермолиниць, Иеве Кузм[и]не, (Примечание: от и сохранилась только левая мачта ) Нефедья Парфееве. А у печяти стоял в братьи своеи место в Мартемьяново и в [И]ваново (Примечание: е в ркп. утрата ж буква утрачена при обрезке грамоты )и во Ондреяново брат их Якове, а В[а]сильево (Примечание: буква утрачена при обрезке грамоты ) место у печяти стоял сын его Остафии. А хто сии рядъ (Примечание: конечная читается предположительно) поруши, дасть князю и владыце десять гривен золота.