Се аз Иван Григорьевич Выротков дал есми вклад в дом Живоначалные Троицы и пречистые Богородицы и великому чюдотворцу Сергею и Никону и архимариту Памве з братьею вотчинку свою в Дмитровском уезде в Повелском стану селцо Думино да деревню Дехтярку с селищи и с пустошми и з заросльми и с лесы и с луги и с пашнею и со всеми угодьи, куды истари ходил топор и коса и соха по старым межам. А дал есми ту свою вотчинку в дом Живоначалные Троицы и чюдотворцу Сергею впрок без выкупа по собе и по своих родителех для вечнаго ради покоя. А та у меня вотчина селцо Думино с селищи и с пустошми и з заросломи ни продана ни заложена, ни в ином монастыре по душе не отдана ни в каких крепостех, ни в хлебных, ни в денежных ни у ково. А роду моему и племяни и жене моей и детем моим до тое вотчины дела нет. А хто станет в ту мою вотчину роду моего и племяни вступатись, и им со мною суд будет пред Спасом в будущем веце на втором Христове пришествие. А хто учнет в ту вотчину вступатись или выложит какие крепости хлебные или денежные или иные какие крепости ни буди, и мне Ивану та вотчина очищати, а архимарита з братьею убытка не довести никоторово. А на то послуси Борис Зачесломской да Юрьи Нелюбов сын Зачесломской да Пятой Иларионов сын, да Петр Захарьин сын Рогатин. А у сеи даной сидел отец мой духовной черной священник покровской Инокентей. А даную писал Истомка Исаев. Лета 7073-го.