Текст на языке оригинала
Се аз, князь велики Иван Васильевич всеа Руси пожаловал есми Троицкого Сергеева монастыря игумена Иасафа з братьею, или кто по нем иныи игумен будет, что их село манастырское Илемна з деревнями в нашей отчине в Верее, и хто у них в том селе и в деревнях учнет жити людей, и тех их людей наместницы наши верейские и их тиуни не судят ни в чем, опричь одного душегубства, а праведчики и доводчики поборов своих на них не берут и не въезжают к ним ни по что, а ведает и судит игумен тех своих людей сам во всем, или кому прикажут, а случится суд сместной тем их людем з городцкими людми или с становыми, и наместницы наши вереиские и их тиуни тх их людей судят, а приказчик манастырской с ними ж судит, а прав будет или виноват городцкой человек или становой, и он в правде и в вине наместнику Иасафу, а прав будет или виноват манастырской человек, и он в правде и в вине манастырю, а наместницы наши верейские и их тиуни в манастырского человека не вступаются ни в правого, ни в виноватого ничем. А кому будет каково дело до манастырского приказчика, ино его сужу аз князь велики или мой боярин введенной. Также есми пожаловал: те их люди к дворским, ни к сотцким, ни к десятцким с черными людьми не тянут ни во что, ни в какие проторы, ни в розметы, ни коня моего не кормят, ни сен не косят, и закосного не дают, ни двора моего, ни волостелиных не ставят, ни поворотного не дают. А хто у них з дерева убиется, или кого дерево убьет, и хто в воде утонет, и хто от своих рук утеряется, или их уловом подкинут, и наместницы наши того обыщут, да велят того схоронити беспенно, а хрестьяном их в том продажи не учинят. Также и пятенщики мои верейские коней у манастырских людей не пятнят, а держыт манастырской приказчик у себя пятно свое манастырское и конеи у манастырских хрестьян пятнит своим пятном. Также есми пожаловал игумена з братьею: дают мне с того села и з деревень з году на год на Рожество Христово за дань, и за ямские деньги, и за примет в мою казну оброком восмь рублев.