Божиею (прим. 1) милостию мы, великий государь царь и великий князь Василей Иванович всеа Русии, пожаловал (прим. 2) есми шуян посадцких людей соцкого Захарка Павлова, да земских целовалников Петрушу Макарова, да Чюдинка Михайлова и всех шуян посадцких лутчих, и середних, и молотчих людей, что били они нам челом была у них блаженные памяти государя царя и великого князя Ивана Васильевича всеа Русии жаловалная уставная грамота, и та-де у них грамота переписана на Ростригино имя, и (прим. 3) нам бы шуян посадцких людей пожаловати, велети им тое уставную грамоту переписати на наше царское имя. И (прим. 3) мы, великий государь царь и великий князь Василей Иванович всеа Русии самодержец, шуян посадцких людей соцкого Захарка Павлова, и земских целовалников Петрушу Макарова и Чюдинка Михайлова, и всех шуян посадцких людей пожаловали, велели им дати нашу царскую новую уставную грамоту на наше царское имя, а судитися шуяном посадцким людем по сей нашей уставной грамоте меж собя самим по-прежнему, а кому их судити и управа меж их чинити, и наши четвертные доходы збирати по книгам сполна, и шуяне посадцкие люди всем посадом выбирают меж собя в ызлюбленные в земские судьи по годом посадцких же лутчих и середних людей добрых и просужих, которые б были душею прямы и всем им, посадцким людем, были любы. А выборы тех земских судьях посадцкие люди за своими и за отцов их духовных руками присылают к нам к Москве в Четвертной приказ, и тех судей на Москве приведут х крестному целованью. А по выбору те их излюбленные земские судьи их, шуян посадцких людей, судят и управу меж их чинят безволокитно, и наши четвертные доходы за наместничьих пошлинных людей доход, и присуд, и всякие наши четвертные доходы збирают по книгам сполна, и присылают их к нам к Москве в Четвертной приказ на срок же год беспереводно. А судити земским судьям шуян посадцких людей по нашему крестному целованью по сей нашей царской жаловалной грамоте, хто взыщет на ком бою и грабежу до рубля или свыше того, и им, посадцким людем, того сыскивати всем посадом лутчими, и середними, и молотчими людми есть ли его столко животов на колко рублев заищет, и сыщут на него, что бой и грабеж был, и искал своего грабежу по своим животом, и им по тому ответчика обинити. А скажут в ыску, что им бой был, а о грабежу никому ведома нет, и искал истец не по своим животом, и им тех исцов винити. А скажет истец, что у него отнели чюжие животы, и им по тому ж про то сыскивати, чье у него животы отняли, и сыщут допряма, что у того исца чюжие животы были, а на грабеж видоков нет, и им в том присуживать целованье з жеребья. А взыщет хто великих животов рублев до дватцати, или до тритцати, или больши, и им в том по тому ж сыскивати всякими сыски и обыски- // (л. 2) вати накрепко, а чего сыск не иметь, и им в том присуживать целованье з жеребья ж, а хто взыщет поклажея, и им того сыскивати меж собя всеми людьми по тому ж по животом, а чего сыск не иметь, и им в том присуживати веру крестное целованье, а давати на ответчикову волю, хочет сам поцелует или под крест денги положит, а ищея, поцеловав, возмет. А хто взыщет (прим. 4) на ком тех же дел, а посадцким людем про то будет сыскать не мочно, и им в тех делех присуживати целованье з жеребья. А которой истец пошлетца на послухи в заемном деле без кабалы или в какове деле ни буди, и послухи меж собя став порознят, и иные молвят в ысцовы речи, а иные в ысцовы речи не молвят, и которые молвят в ысцовы речи, а попросят с ними те послухи веры, и им присуживати целованье з жеребья, и по жеребью поцелуют послухи те, которые послушествовали в ысцовы речи, и тех послухов, которые в ысцовы речи не послушествовали, обвинити, а исцово имати по списку на ответчиках и на тех послухех, которые не послушествовали в ысцовы речи, а не попросят те послухи веры, которые послушествовали в ысцовы речи, ино тем исца обвинити, а по кабале порознят послухи и диячки ино по тому ж. А которые посадцкие люди меж собя или иногородцы на посадцкого человека учнут в суд класти искати по своим кабалам, а кабалы будут стары болши пятинатцати лет, и по тем по старым кабалам никому никакого суда не давати и денег не правити. А хто на кого положит выданую кабалу хоти одново году, а выдана за долг, и по той кабале суда нет. А которые прямые кабалы менши пятинатцати лет, лет за четырнатцать и за десять, и по тем кабалам на ответчиках, которые повинятца, денги правити истину без росту. А по которым кабалам лет за пять, а ответчик не лживит, и по тем кабалам править денги истинну с росты. А кого послух послушестует в бою, или в грабежу, или в займех, ино дати им целованье з жеребья, или, став у креста, даст ответчик целовати послуху без жеребья, или ответчик, не приводя к целованью, заплатит, в том давати на их волю, а вины в том ответчику нет. А будет в послухех поп или диакон, и тех от послушества отставить, а давати исцом меж собя правду з жеребья, а послух перед судьи не придет, есть ли за ним речи или нет, а доведет на него то пристав, и на том послухе исцовы убытки взяти. А хто взыщет человекех на трех или на четырех по жалобнице, а напишет в жалобницу человек десять, или пятнатцать, или болши, или менши, и те два или три за себя и за иных товарыщев отвечают, а за иных не отвечают и за которых по жалобнице отвечают, и тех судити в их жеребьях, а за которых людей по жалобнице не отвечают, и в тех жеребьях по дасталных ответчиков посылати приставы и давати на них суд. А которой человек взыщет бою и грабежу, и ответчик скажет, что бил, а не грабил, и ответчика в том обинити, а скажет, что грабил, а не бил, и на том грабеж доправити, хто скажет грабил, а в бою толко не помирятца, ино им присужати в бесчестье целованье з жеребья, ищея поцелует, и он безсчестье возмет, а ответчик поцелует, и он // (л. 3) не даст ничего. А в ыных делех судити по тому ж хто в том скажетца виноват, на нем взяти, а вдостали давати крестное целованье. А безчестья посадцким лутчим торговым людем пять рублев, а женам их против их безчестья вдвое. А крестьянину пашенному и не пашенному безчестья рубль, а жене его безчестья два рубли. А черному молотчему человеку рубль же, а женам их вдвое ж. А увечья указывать крестьянину, посмотря по увечью и по бесчестью, и всяким указывать за увечье, смотря по человеку и по увечью по Судебнику. А пошлин с судных дел имати с рубля по гривне, и пересуд, и правой десяток. А ходит меж их же посадцкой довотчик, а хоженово емлет на посадцких людех на посаде денга, а на правду вдвое, а в уезд на версту по деньге. А кому будет на шуянех посадцких людех чего искати, опричь посадцких людей, сторонним людем наших дворцовых, и черных сел и деревень, и патриаршеским, и митрополичьим, и владычним, и монастырским, и боярским, и дворянским, и детей боярских, и прикащиком, и крестьяном, и иногородцом в судах в заемных делех, и в грабежех, и в ыных делех, опричь татьбы и розбою с поличным, и те исцы приходят бити челом к нам к Москве, и мы их приказываем судити в Четверти, где Шуя будет в приказе, и, докладывая нас, меж их чинят управы по нашему царскому указу и по Судебнику. А которого посадцкого человека приведут в татьбе с поличным или без поличного или в розбое, и земским судьям тех посадцких людей отдавати губным старостам и целовальником. А промеж дворов им, посадцким людем, городити изгорода по половинам, а чьею изгородою учинитца убыток, и тому платить. А которые люди шуяне не учнут искати на своих же посадцких людех боев и грабежев ябедничеством двожды и трижды и доведут на них, в том и в ыном в каком воровстве всем посадом и сторонними и посадцким людем на тех воров бити челом нам, великому государю царю и великому князю Василью Ивановичю всеа Русии, и челобитные на них давати за своими и за отцов своих духовных руками в Шуе губным старостам, и городовым приказщиком, и всяким нашим приказным людем, и (прим. 3) мы велим указ свой учинити. А в которых будет делех излюбленным судьям крестьяном управы учинити не мочно, и они суда своего списки и обоих исцов присылают к нам к Москве к докладу в Четверть, где будет в приказе. А в суде у записки всяких дел у излюбленных судей сидеть их же посадцким людем, кого они выберут. А судные и обыскные списки и всякие дела велети писати тем земским диячком перед собою, да к тем запискам излюбленным судьям и лутчим крестьяном, которые грамоте умеют, руки свои приложити, да те записки всякие суденые списки и всякие дела держати судьям за своими печатми, а земским дияком без них судных и обыскных никаких дел не записывати и у себя им не держать ни которыми делы. А учнет земской диячек судные и обыскные и всякие дела записывать, // (л. 4) один не перед ними или которые дела земской диячок учнет держати у себя, а хто на них доведет, и излюбленным судьям и с тем земским диячком быть от нас в великой опале и животы их велим имати на нас. А хто в Шуе на посаде купит лошадь, или продаст, или менит, и посадцкие и всякие люди те лошади являют по нашему указу, а имена людцкие и лошади в шерсть пишут в книги для спору. А хто у них в Шуе на посаде женитца или хто выдаст дочерь замуж из города в волость, и выборные судьи за новоженной убрус и за выводную куницу емлют на нем по прежнему, а хто женитца безъявочно, и на том взяти промыта два рубли. Да шуяном же посадцким людем соцкому Захарку Павлову, и земским целовальником Петруше Макарову и Чюдинку Олексееву с товарыщи, и выборным земским судьям, и всем шуяном посадцким лутчим, и середним, и молотчим людем выбрати и устроити в Шуе в городе и на посаде пятидесятцких и десятцких посадцких же людей, которые б были добры, и просужи, и душею прямы, и всем бы посадцким людем любы были, и велели им в городе и на посаде беречи накрепко, чтоб посадцкие всякие люди у себя по подворьям корчем и блядни не держали, и лихим людем татем и розбойником приезду себе не чинили, и татиною и розбойною рухлядью не промышляли, и лихих людей воров, и ябедников, и подпищиков, и убойцов, и всяких лихих людей у себя нихто не держал. А хто в Шуе в городе и на посаде учнет воровать, корчму и блядню держати и лихим людем татем и розбойником к себе приезд чинити, или ябедников, и подпищиков, и убойцов у себя держати, или хто татиною и розбойною рухлядью учнет промышлять и ябедничеством продавати, и тех лихих людей, имая, отдавати губным старостам, и городовым приказщиком, и всяким людем безпенно. А приказные люди посадцким людем, опричь тех хто учнет у себя воры держать, пени продажи не чинят, а про тех лихих людей обыскивают по нашему крестному целованью, и которые лихие люди по суду и по обыску дойдут до казни, и тех лихих людей казнят губные старосты и всякие наши приказные люди по нашему указу из Розбойного приказу, а которой пятидесятцкой и десятцой тово лихово человека, которой жил у них в сотне, не сыщут, а губные старосты про то сыщут вправду, что тот человек тать или розбойник, и на том пятидесятцком или на десятцком, доправя исцовы иски, отдавати исцом, а того пятидесятцкого и десятцкого в нашей пене подавати на крепкие поруки, чтоб у них лихих людей в сотне вперед не было. А которой посадцкой человек пустит проезжево человека к себе на двор начевати, а старостам, и целовальником, и пятидесятцком, и десятцким, не явя, и на том посадцком человеке имати заповеди два рубли. Также наши дворяне, и дети боярские, и всякие приезжие люди в Шуе сильно у посадцких людей не ставятца, и подвод, и проводников, и корму своего и конского сильно // (л. 5) не емлют, а хто у них станет, и он себе и конской корм купит. А которые иногородцы приедут в Шую каким делом ни буди и взыщут на посадцких людех бою и грабежу или иных дел каких ни буди, и им управа давать по тому ж, как и посадчаном меж собя по сей грамоте. А встречю посадчаном на иногородцех перед своими судьями не отыскивати, а приезжево человека торгового или иново какова человека приезжего изымают в Шуе на посаде с поличным в татьбе, или в розбое, или в грабеже, и тех людей отдавати губным старостам, а в которых делех в сей грамоте указ не написан, и те им дела вершити по Судебнику. А хто у них в городе и на посаде от своих рук утеряетца, или кого древом убьет, или з древа убьетца, или кого зверь съест, или кого гром убьет, или хто студена умрет, или вешнею водою лете рекою припловет с верховья убитой человек, или утопленик против городцкие земли станет к берегу, или мертвово хто вывезчи из города на всполье на городцкой земле покинет, про то в Шуе сыскивают по нашему наказу и по грамотам нашим приказные люди, и губные старосты, и городовые приказщики. Также есмя шуян пожаловали, на пир к ним и на братчины нихто не зван не ходит и не ездит. А хто к ним на пир не зван приедет, и того вышлют вон безпенно. А хто ис пиру не поедет и учинитца у них какова гибель, и на том та гибель взяти без суда и без правды. И скоморохи к ним играти не ходят. Дана ся наша царская жаловалная уставная грамота на Москве лета 7114-го июля в 7 день. //
(л. 1 об.) Царь и великий князь Василей Иванович всеа Русии.
122-го февраля в 27 день государь царь и великий князь Михайло Федорович всеа Русии сее жаловалные уставные грамоты слушал и шуян посадцких людей пожаловал, велел им сее уставную грамоту подписать на свое государево царево и великого князя Михаила Федоровича всеа Русии имя, а рудить ее ни в чем не велел, а велел им во всем ходить по тому как в сей в уставной грамоте написано. А подписал государев царев и великого князя Михаила Федоровича всеа Русии диак Семен Головин.
(л. 1 об., 2 об.) Ди- // (л. 2 об., 3 об.) ак // (л. 3 об., 4 об.) Василей // (л. 4 об., 5 об.) Марков.
(л. 5 об.) Взято пошлин рубль 8 алтын 2 деньги.