Текст на языке оригинала
По прадеда своего грамоте великого князя Дмитрея Ивановичя и по деда своего грамоте великого князя Василья Дмитреевичя и по отца своего грамоте великого князя Василья Василiевичя се яз, князь велики Иван Васильевич всея Руси, пожаловал есми своих русских тонников, внучят и правнучят Якимовых и Михеевых и Олухиных и Демешковых Федора з братом, Перфурья з братьею, Василья Семенова з братьею, Лукьяна з братьею, Ивана з братьею, Парфея з братьею. Дал есмь им грамоту по старым грамотам: погоста им не платити, ни в чернои бор им не тянути, а литовскому послу подвод им не давати, ни на дворе у них не стояти, ни навогородскому послу оу них на дворе не стояти, ни корму ни подвод им не давати. А сотнои соли писчеи им не платити рушаном. А дают мне, великому князю, по три берковски меду через год, а не будет меду, ино по три рубли. А в виру им с рушаны не тянути. А дрова им по рекам плавити на себя. А русьским промыслом им промышляти, соль варити. А с рушаны им в их потуг не тянути. Ни подвоиским русским их не позывати. Ни посаднику рускому их не судити, ни с поличным. Или их скуют в Русе, ино взяти у него дворянину пять кун. А в Любце им земля орати, где им любо. А иному в ту землю мою, великого князя, не вступатися. А завод тои моеи земле: от Полисти реки по Воеи ручяи, а от Воя ручья до Ближнеи Соминки по Радынь путь, а от Ближнеи Соминки до Далнеи Соминки, а от Далнеи Соминки Конюшим путем до Редьи реки в Хоболеи ручяи. А косити моим, великого князя, тонником руским по Конюшеи путь, а вниз по обе стороны Соминки по Роскрисе. А дворяном моим з Городища ни подвоиским новогородским ни биричем ни софьяном владычним моих тонников русских не позывати ни в какове деле. А кому будет до них каково орудье, ино ехати на них от меня, от великого князя, ловчему, а отпущенику не ехати, в его место никому не позывати. А без меня, без великого князя, не судити, или без моего наместника. А звати их с осеннего Николина дни до Середохрестья. А позовнику езду взяти у них гривна. А что дана пожня Святеи Богородици, и та пожня коси (Примечание: так в ркп.) старостам по Зимнеи выезд до Комарова ручья. А хто через сю мою грамоту, великого князя, подеет силно над ними, и яз, князь велики, могу боронити. А на сю грамоту инои грамоте не быти.