Текст на языке оригинала
Се яз, царь и великий князь Иван Васильевич всеа Русии, пожаловал есми Пречистые Богородицы Симанова монастыря архимандрита Феоктиста з братьею или хто по нем иный архимандритом в том монастыре будет. Били челом мне, царю и великому князю, архимандрит Феоктист з братьею, что их монастырские села и деревни в Можайском уезде, село Ватолинское з деревнями, и на то-де село з деревнями у них грамота жаловалная великого князя Ивана Васильевича, а на мое царево и великого князя имя не подписана. Да и грамоту жаловалную архимандрит Феоктист на то село з деревнями передо мною, царем и великим князем, клал. И мне б, царю и великому князю, архимандрита Феоктиста з братьею пожаловати, велети им на то их село и на деревни дать своя жаловалная грамота. И яз, царь и великий князь Иван Васильевич всеа Русии, архимандрита Феоктиста з братьею пожаловал. Ненадобе им с того села из деревень моя царева и великого князя дань, ни ямские, ни приметные денги, ни за емчюжное, ни за засечное дело. А хто у них в том селе и в деревнях учнут жити людей, и наместницы наши можайские, и волостели, и их тиуны тех их людей не судят ни в чем, оприч душегубства, и розбоя, и татьбы с поличным, ни кормов своих на них не емлют, ни всылают к ним ни по что. А праведчику и довотчику поборов своих на них не емлют же, ни вьезжают к ним ни по что. А ведают и судят тех своих людей архимандрит Феоктист з братьею сами во всем или кому прикажют. А случитца суд смесной тех их людей з городцкими людми или с волостными, и наши наместницы, и волостели, и их тиуни тех их людей судят, а архимандрит Феоктист з братьею и их приказщик с ними же судят. А прав или виноват монастырской, и он в правде и в вине архимандриту з братьею. А городцкой и волостной в правде и в вине наместнику, и волостелю, и их тиуном. А кому будет чего искати на манастырских людех, ино их сужю яз, царь и великий князь, или мой боярин введеный в опришнине. Также есми архимандрита Феоктиста з братьею пожаовал, ненадобе им не мыт, ни явка, ни вещее, ни коня моего не кормят, ни лугов моих не косят, не двора моего, не наместнича не делают, ни прудов моих не прудят, ни поворотного, ни выводные куницы ни дают ни к дворским, ни к соцким, ни к десятцким, с тяглыми людми не тянут ни в какие проторы, ни в розметы. А хто у них в том селе и в деревнях пойдет от своих рук, или хто з дерева убьетца, или кого дерево убьет в лесе, или в воде утонет, или водою напловет, или их убитым подкинут из-за рубежья, и наши наместницы, и волостели, и их тиуни в том на них продажи и езду не емлют, а, осмотрив, велят того схоронити безпенно. А наши князи, и бояре, и дети боярские, и ратные воеводы, и ловчие, и псари, и бобровники, и всякие ездоки в том их в селе и в деревнях не ставятца, ни кормов, ни подвод, ни проводников у них не емлют, и гонцы мои подвод ни проводников у них не емлют же, опричь ратных вестей. А хто у них станет силно и что возмет, и тому платити без суда и без ысправы. А мои, царя и великого князя, селчане и наместников и волостелей наших люди к тем монастырским людем на пиры и братчины незваны не ходят. А хто к ним придет на пир и на братчины незван, и они того вышлют безпенно. А хто у них учнет пити силно, а учинитца у них в ту пору гибель, и тому платити та гибель вдвое без суда и без ысправы. Также есми пожаловал архимандрита Феоктиста з братьею, в том их монастырском селе и в деревнях попрашатые не ездят и скоморохи не играют. А хто по их по монастырскому селу и по деревням попрошатые учнут ездити или скоморохи учнут у них играти силно, и монастырской приказщик ис того монастырского села и из деревень вышлет их вон безпенно. А пятно архимандрит в том селе держит свое. А хто их монастырской купит лошадь в городе или в волости, и они те лошади пятнают своим пятном монастырским, а пошлины дают монастырскому приказщику. А хто у их людей купит лошадь или выменит, волостной человек, и он пятнит волостным пятном. А которого наместника своего можайского пожалую, и на грамоты в грамоту дам. А на сю мою грамоту иные грамоты нет. А явят сю грамоту можайскому наместнику, и волостелям, и их тиуном, и они с нее явки не дают ничего. А дана грамота на Москве лета 7076 сентября в 18.