Текст на языке оригинала
Се яз, царь и великий князь Иван Васильевич всеа Русии, пожаловал есми живоначальные Троицы Сергиева монастыря келаря Дорофея и священников и всю братию или хто у них в том монастыре архимарит будет. Били нам челом, а сказывают, что их село Илемна з деревнями в Верейском уезде, и на то село з деревнями была у них князя Володимера Онд[реевича грамо]та жаловалная ото всех податей, и нам бы их пожаловати, на то село з деревнями дати своя грамота жаловалная новая, такова ж, какова у них была наперед сего, да и грамоту жаловалную прежнюю перед нами клали. И яз, царь и великий князь тое грамоты слушав Троетцкого Сергиева монастыря келаря Дорофея и священников и всю братию и хто по них архимандрит будет пожаловал: что их село монастырское Илемна з деревнями в нашей отчине в Верее, и хто у них в том селе и в деревнях учнут житии людеи и крестьян, и тех их людем наместницы наши верейские и их тиуни не судят ни в чем опричь душегубства, а праведчики и доводчики поборов своих на них не берут и не въезжают к ним ни по что, а ведает и судит келарь з братею, или хто у них архимарит будет, тех своих людей и крестьян сами во всем, или кому прикажут. А случитца суд смесной тем их людем и крестьяном з городцкими людьми или с становыми, и намесницы наши верейские и их тиуни тех их людей судят, а приказщик монастырской с ними ж судит, а прав ли будет, или виноват городцкой человек или становой, и он в правде и в вине наместнику и его тиуну, а прав будет или виноват монастырской человек, и он в правде и в вине монастырю, а наместницы наши верейские и их тиуни в монастырского человека не вступаютца ни в правого ни в виноватого ничем, а кому будет какого дела искати на монастырском приказщике, ино его сужю яз, царь и великий князь или мой дворетцкой Большого Дворца. Тако же есми их пожаловал тех их людей: к дворским, ни к сотцким, ни к десятцким с черными людьми не тянут ни во что, ни в какие проторы, ни в розметы, ни коня моего не кормят, ни сен не косят, ни закосного не дают, ни двора моего, ни волостелиных не ставят, ни поворотного не дают, а хто у них з дерева убьетца, или кого дерево убьет, или в воде утонет, или хто от своих рук утеряетца, или их хто подкинет убитым человеком, и намесницы наши того обыщут да велят того и схоронити безпенно, а на хрестьянех на их веры не емлют, и в том им продажи не учинят, и пятенщики мои верейские конеи у монастырских людеи и у крестьян не пятнят, а держит монастырской приказщик у себя пятно свое монастырское, и кони у монастырских хрестьян пятнит своим пятном. Такоже есми пожаловал келаря и всю братию, или хто у них в манастыре архимандрит будет: давати им с того села и з деревень з году на год на Рожество Христово за дань и за ямские деньги и за примет в нашу казну оброком восмь рублев денег. А у кого у монастырских людей будет пир или братчина, и к тем к их людем к монастырским их крестьяном на пир незван не ходит нихто, а хто придет к ним на пир, или на братчину незван, и они того вышлют вон безпенно, а хто у них учнет пити сильно, а учинитца у них какова гибель, и ему та гибель платити без суда и без исправы. А наши недельщики дают на поруку монастырских людей и хрестьян, такоже и от монастырских хрестьян, а учинят монастырским крестьяном два срока в году: зиме в той же день по Крещенье Христове, а лете уговев Петрова говеина неделю, а хто на монастырских хрестьян накинет срок, а не по сему их грамотному сроку, и яз им к тому сроку ездити не велел, а хто на них возмет и безсудную грамоту, а не по сему их грамотному сроку, и та безсудная не в безсудную, а пристав езду лишен, а у которого будет наместника или у волостеля моя жаловалная грамота на грамоты, а на сю мою грамоту грамоты нет, а коли явят сю мою грамоту нашим наместником или волостелем и их тиуном, и они с нее не дают ничего. А дана грамота на Москве лета 7074-го июня в 21 день.