РГБ; Иос.-Волок. 534, лл. 642–646_Запись 1.

РГБ; Иос.-Волок. 534, лл. 642–646_Запись 1.

РГБ; Иос.-Волок. 534, лл. 642–646_Запись 1.

«Благодатию и человѣколюбием Господа нашего Иисус Христа и пречистыя Его Матере, и призыванием молитв, еже на помощь и поспѣшение, преподобнаго отца нашего игумена Иосифа, и игумена, и отца нашего кир Данила написана бысть книжица сиа лѣта 7027 мѣсяца мая 28 в обители пресвятыя владычица нашея Богородица, славнаго Ея Успениа, еже есть Иосифов манастырь, при настоятельствѣ преподобнаго отца нашего и господина игумена кир Данила. Но ты, съборѣ, Богом събранныи и молитвами, и трудолюбием преподобнаго отца нашего игумена Иосифа, о Христѣ отци и братия, царьское священие и церковное украшение, земнии анггели, небеснии человѣци, молю убо вас и мил ся дѣю, и колѣном вашим касаюся, прочитающе книжицу сию и зряще неудобрение художества, не прорѣцѣте Господа ради тяжести на душу грѣшнаго и послѣдняго во иноцѣх Фотѣя, преписавшаго книжицу сию и трудившаяся о неи, но проницающе в силу словес и от сих упивающеся умилениа вином ражающим страх Божии и непрестанное о души попечение. Братолюбие нелицемѣрно и вашь покои украсит Господь знамением и небесныа отверзеть двери, и огненое отложит оружие, и в горнии введет вы Иерусалим, и десницею вѣнчает, и трапезу представит, и чашу веселиа и радости подасть вам. Мене же акы пса злонравнаго, молю, вы не презрѣте, но и зде в святых своих молитвах Христа ради помянѣте мене грѣшнаго, да отпустит ми тьмы прегрѣшении моих, да и аз получив нѣкую часть от молитв ваших, возрадуюся душею и возвеселюся духом о вашем наслѣдии и веселии, и радости. И тоя святыя трапезы крупици поверзите мне акы псу лихому, ея же буди всѣм христианом сподобитися жизни вѣчнѣи о Христѣ Иисусѣ Господѣ нашем, Ему же слава с Отцем и с Святым Духом нынѣ и присно, и в бесконечныя вѣкы вѣком. Аз бо грѣшныи и злонравныи прѣписах книжицу сию, похваляя святых отець бодрое и долготерпеливое их житие, свою же похуляя немощь и сонную тяготу, и окаанную лѣность. И аще еси, брате и господинѣ, лѣнив яко же и аз, но обаче въспряни, молюся, и помысли дары, яже обеща Господь любящам Его и тружающимся имени Его ради. Вѣщаше бо божественыи апостол Павел: Иже ни око видѣ, ни ухо слыша, ни на сердце человеку не взыде, еже уготова Бог любящим Его, идѣже желают анггелы приникнути. Сего ради списах книжицу сию, збирая богодухновенна словеса, хотѣх исправити злонравие свое, но не вѣм, аще есть исправлю, видѣх бо в пророчествѣ написано, глаголющее, аще измѣнит мурин кожю свою и рысь пестроты своя, и ты възможеши добро творити научився зльм, занеже есми образом чернець, а нравы своими свинья, яко и пес болии мене есть, обьядаю бо ся, яко медвѣдь, питаюся акы мъска, злопамятлив же яко велбуд, пронырлив же яко лисица, яд же лукваьствиа съхраняю яко аспида змиа. Брань же з братею твою, яко лукавыи бѣс како такову ми сущу ми с человѣкы могу съчетатися, не зрящу ми себѣ подобиа человѣчьскаго, но и человѣк есмь, и звѣрь есмь всѣми нравы, не вѣм же, что нареку себе, звѣря ли, но звѣрие едино от сих злых имат, аз же вся злая събрав купно, имам паче онѣх бе словесными пути ходящу ми. Бѣса ли наруку (!) себе, обаче же и бѣсъчревному неистовьству не работает, ни злата желает, егда же паче звѣрии и бѣсов горши дѣла имам, како могу человѣк нарещися такову ми сущу, ни познаваю душа своеа бесчестия и смрада. Сиа же писах ни смиряяся ниже тщеславихся, но по Господню словеси еи токову ми сущу, а и сами зрите мя такова, яко же писах вся нравы своя, а и Писание глаголет, яко великое смирение большая гордость. Никто же убо да непозазрит моему неразумию, яко не по ряду сиа повѣсти и наказаниа писах, и чрез стихи понеже на обличение мое и души, и злонравию сиа събрах, яко нечювьствующу ми и неимущу смирениа, ни страха Божиа в сердци моем нѣсть. Да некли прочет сиа и воздохнет, и воспомянет себѣ наказаниа сих отець святых и преподобных и подвиги, и смирение, слезы и терпѣниа, и преже смерти умертвие»

лл. 642–646

28 мая 1519 г.

Фотий, инок Иосифо-Волоколамского монастыря

Писцовая