ИРЛИ; Величко 1, л. 572–577_писцовая запись2

ИРЛИ; Величко 1, л. 572–577_писцовая запись2

ИРЛИ; Величко 1, л. 572–577_писцовая запись2

Согласно записи, кодекс был переписан Геннадием в качестве вклада на помин души по себе и по своих родителях. В текст записи включен канон за единоумершего (л. 573 об. – 576 об.), завершающийся отпускной молитвой с именем Геннадия на л. 576 об. – 577.

«Господи, Исусе Христе, Сыне Божии, молитвъ ради пречистыа ти Матере, силою честнаго и животворящаго креста и святых небѣсных ти силъ и всѣх святых, иже от вѣка угожьших ти, и за молитвъ отца моего и господина моего, старца Филимона, и прочих, иже с ними въ скитѣ, сподобль мя, грѣшнаго, кончати книгу сию лѣта 7020 ноемврио 30. Но Господи мои, Господи, благоволивыи грѣшникы спасти, имиже вѣси судбами, помилуи мя, многогрѣшнаго, и прости ми вся, елика согрѣших не по естьству, яко человѣкъ, и въ исход окааннѣишаа душа моея посли аггела мирна, вѣрна хранителя, и в будущии вѣкъ избави мя вѣчнаго мучениа, яко Ты еси упование всѣмь концем земли и сущимь в мори далече. Сирѣчь в конечнеи злобѣ азъ, окааннѣишии, одержимъ, отнудь не имѣю конца грѣховному обычаю, но молю и милъ ся дѣю, ужасаяся, и трепещу за недостоинство мое. О всемилостивая пречистая Дѣво Владычице Богородице Марие, Мати Господа моего, нѣсть ми иного высочаиши на небѣси и на земли, якоже ты, по Господѣ Бозѣ моемь Исусе Христе. Тя имѣю, пресвятая, и тебѣ въпию: помози окаанству моему, способьствуи сиротству моему и исправление ми даждь прежде, даже не варить мене смертное посѣчение. Духовныи мои святыи отче и господине игумене, и господие мои, отци святии, Бога ради сътворите со мною послѣднюю любовь и милость сицеву, Бога ради помилуите мя, грѣшна. Състанется Божиа воля, не будет мене в живыхъ, сътворите четыредесят днии, на всякъ день у жертовника Божиа съжагающе свѣчку канархалную на обѣдни, а священникъ бы просфуру вынялъ о моеи многогрѣшнои души. И поите за мя канон сеи трижды на третиины, и на девятины, и на 40-ны ли самь государь мои игумен, ли священникъ, ли единъ от братеи господ моих, умѣющии писанию. Аще ли и болши того благоволите пропѣти канонъ сеи за мя, то болшую ми ползу сътворите и сами болшую мъзду приимете от Бога, рекшаго: в нюже мѣру мѣрите, възмѣрится вамь, и пакы: помиловавыи помилован будеши. И впишите въ повседневныи списокъ грѣшнаго Генадиа, на колко пожалуите, да и в синаникъ с родителми моими. И се ми от вас мъзда за варавление книги сея. Не се же едино помяшляите, яко мертво тѣло мое уже, но паче помыслите, коль тяжко и горко и болѣзнено и тугы и тоскы неизреченныа исполнено бывает человѣчьскому естьству смерть, паче же грѣшнику, и яже на разлучении от бѣсовъ обличениа досадителная и истязаниа о всяком дѣлѣ и словѣ и о помышлении волном и неволном. Такожде и егда святии аггели поведут душю на въздух преходити мытарства лютаго миродержаца, колика страхованиа и коликы грозы бывают душамь, якоже пишут мнози святии. И егда приведут душю поклонитися престолу славы Господня, и повелить Господь показати души жилища святых, праведнои души на утѣшение, а грѣшнои на болшее оскорбление, яко таковых благъ лишена бысть, и паки велит Господь вести душю в подземная мѣста темная, въ преисподнии адъ, показати еи грозныа муки, неизреченныя словом и недомыслимыя умом, но токмо вѣрою вѣровати, яко есть таковыя мукы. И нынѣ въ всѣх сих преднаписаных бѣдствует душа моя. И сего ради проразумѣвъ преже, яко быти тому тако, написах моею рукою молебное се писание сице: помилуите мя, Бога ради, о честнѣишии отче и господие мои отци, и въ святых своих молитвах помяните окааньство мое, якоже многажды жаловали есте худость мою и кормили и поили чювьственѣ. Тако и нынѣ духовнѣ споскорбите, да ми поможете вѣчных скорбеи избыти, надѣю бо ся, да егда видит Богъ любовь вашу, иже есте не презрѣли молебнаго прошениа моего, не презрит молениа вашего и дасть вам прошениа ваша, яже къ спасению вашему, и мене помилует, яко многомилостивъ и человѣколюбец. Аще бо легеону оному бѣсовьскому прошение далъ есть и въ стадо свиное попусти внити, то колми паче рабъ своих услышит молитву и обѣщание свое исполнит, еже самь рече: вся, елика въ молитвѣ просите с вѣрою, приимете; нѣбо и земля мимо идет, а словеса моя не преидут. Будите же здрави, о честнѣишии отче и господие мои отци, о Христѣ, и спасаитеся молитвами всѣхъ святых, аминь. Вѣдомо же буди, сице да поешь канон за мя [...] Господи Исусе Христе Сыне Божии, молитвъ ради пречистыа ти Матере и преподобных и богоносных отець наших и всѣх святых ради, помилуи, Господи, душю раба твоего грѣшнаго Генадиа въ бесконечныя вѣкы, яко благъ и человѣколюбец. Слава свершителю Богу, иже въ Троици славимому херувимскими усты въ вышнихъ за триипостасное Божество».

Л. 572–577

1511

Геннадий, инок скита близ Ферапонтова Белозерского монастыря (XV–XVI вв.)

Писцовая