РНБ; Кир.-Бел. 14/1091, л. 280 об.–282 об._писцовая запись

РНБ; Кир.-Бел. 14/1091, л. 280 об.–282 об._писцовая запись

РНБ; Кир.-Бел. 14/1091, л. 280 об.–282 об._писцовая запись

Запись выполнена Иваном Ивановым сыном Мочаловым в первой писцовой манере.

«Лѣта 7001-го поспешеньемъ всемилостиваго Спаса и пренепорочныя его Матере достиже сие писание конца повелѣниемъ Анисима Ананиича при великом князѣ Иванѣ Васильевичѣ Киевьском и Московьским и всея Руси и при епископѣ нашем Филофѣе Пермьскомь и Вологоцким во градѣ, нарицаемѣмь Вологда, у Святаго у великого страстотерпьца и побѣдоносца Георгия Чюдотворца на Зарѣчье. А писал георгиевьскои диякон Иванъ Ивановъ сынъ Мочаловъ, закоснениемъ преиде время немало, еже писати ми вскорѣ списана бысть сия книга, глаголемая Диоптра, сирѣчь зерцало, месяца декабря 3 день на па//мять святаго пророка Съфония. Ты же, Господине драгии, о сиемъ дѣлѣ отложи нашеи худости наше к тебѣ неисправление, заеже, Господине, и самъ вѣси, колику тяжесть имат житие се, в нем же, Господине, и самъ на всякъ часъ трудишися. Молюся тебѣ, своему господину, и к колѣном твоим прикасаюся, понеже, господне, вѣмъ по изообилу, яко велику имѣеши ко мнѣ любовь, ея же великии апостолъ Павелъ языкъ всѣх апостолъ именуеть, понеже любы все терпит и всему вѣру иметь и ни о чем же не раздражается, понеже совершеннѣише реку любы закону и пророком исполнение высочаиче и велегласно о любви Иоаннъново словъ именуемыи сынъ Громовъ вопиет сице: возлюблении, аще кто речет, яко Бога люблю, а брата своего ненавидить, ложь есть и не творит // истинны. Како можеть Бога любити, его же не видѣ, а брата своего на всякъ час зрит, а не любить. Сию заповѣдь имам от Бога, яко всякъ любяи Бога, любить и брата своего. Мнози писатели о любви писаша, их же именъ аще имамъ писати, то мнози суть зило. Великии Ефрѣмъ Сириискии от апостола приимъ велегласно о любви писание, изложии и много о любви изъгласи: «Конечное, – рече, – любви ради сынъ Божии сниде с небеси и наше существо приимъ». И Богъ человѣкъ бысть, и человѣка Бога сотвори, что высочаише сего Христосъ на всякъ час во благовѣстованиихъ вопиеть. И сего высочаише любите враги ваша и добро творите ненавидящимъ васъ. Аще убо любимъ любящия нас, по о//сподьскому словеси, мытари и грѣшники то же творят, заимное дѣиство творящи. Нам же, господине, подобает не заимную любовь имѣти ко ближнему своему, но истинную, но житие мое строптивое по настоящему сему времени не дасть ми к тебе житие отписати, яко же хощеться подобенъ есмь сѣмени злому, его же Господь нашь во Еуагели паде межи ерния и подавися, но токмо слышелъ еси сице: здравьствуи о Господѣ и о нас воспоминание имѣи к Господу. Молю твою всекрасную душю, да помянеши наше недостоиньство во своих молитвахъ ко Господу Богу нашему о нашем согрѣшении, понеже, господине, тяжчаишими грѣхи обложенъ есмь, нося в себе помышлении // многосмущенную бурю подобенъ есмь мужу, смотрящему в тикру свои зракъ, зрящему и отшед въскорѣ и забывъ себе каковъ бияше, яко же и во отеческих книгахъ пишеть, еже видѣ преподобныи онъ старець мужа сѣкущаго дрова. И насѣкъ бремя дровъ зило тяшко, и прииде подьяти и не возможе, и паки начатъ сѣщи, и нача прикладати, а яко же подъяти бремя возмощи бы. О том попечение отложи, сице и азъ на всякъ час сие творю, но престану глаголати: лучше есть молчати, нежели паучинная простирати прядения. Лѣто же течеть от Адама, чтомо есть сие 7000-ное. Слава съвершителю и всевидьцю преблагому Богу, даюущему начало и конець всякому дѣлу благу, иже о немъ начинаему. Аминь».

л. 280 об.–282 об.

1492

Иван III Васильевич, великий князь московский

Писцовая