Писцовая. РНБ, F.п.II.1, л. 402 об.

Писцовая. РНБ, F.п.II.1, л. 402 об.

Писцовая. РНБ, F.п.II.1, л. 402 об.

Изволениениемь Отца и свершениемь Сына и поспѣшенемь Святаго Духа и молитвами пресвятыя Богородица и преславные мученики Борис и Глѣб и святых преподобных отець наших, уставльших намь святая правила вселенских и помѣстных сборъ, когда и в которыи врѣмя и на кых мѣстѣх собравшеся изложша и взаконивше, уставиша и прѣдаша нам Богомь реченая правила сиа. Си же правила никии же почитая да не потаить от епископа и митрополита, зань повѣлѣно не таити писана святыми отцы и от всѣхъ вѣдомым быти. Во дни же благовѣрнаго х[ристолю]бца князя Ярослава и брата его Феодора Рязаньскыхъ князь [и вели]кыѣ княгини матере ихъ Анастасьи благодать и истина Исуса Христа Господа Спаса нашего посѣтивши святую церковь Рязаньскую и в совокуплѣние сбирающи съ единогласьемь и духомь мирном, вѣровавше Христовѣ благодати и Святому Духу, благовѣрная княгини рече: да ти дасть Богъ, отче, за трудъ сьи небесныи покои. Не прѣзрѣ Богъ в державѣ нашеи церковъ вдовьствующь, сирѣчь безъ епископа и безъ учѣнья святыхъ отець. Благодаримъ о сем Бога и пресвященого Максима митрополита, исполни бо желание Богомь избраному пастырю и учителю словеснаго стада правовѣрныя вѣры нашея, отцю нашему по духу священому епископу Иосифу богоспасеноѣ облась Рязаньсѣи. О семь благодарить господьство нашь преподобьство твое, Иосифе, еже о Христѣ приявъ писание се от великаго владычества прѣславнаго града Киева, от него же отрасль мы быхомь. Азъ же, епископъ Сиф Рязаньсии, испросивъ от митрополита протофроне сию, преписахъ на увѣдѣние разуму и на просвѣщение вѣрным и послушающимъ и за свято почившихъ князь Рязаньскых и пресвященых епископъ. Буди в любви писание се господьству князии наших, миръ ти о Господѣ, прѣсвященыи епископе Иосифе. Мы же раздѣливше на 5 часть исписахомъ 80 днии, почахом ноября 1, а кончахом декембря 19, в лѣто 6792, солнечного круга 5, а лунньного 13, законн[и]е 9-е, индикта въ 13. Мы же, грѣшнии и худоумнии, моля вы слезно, отци и братья, чтущим и прѣписующии, легко исправляюще чтѣте, а не злословѣте, но паче благословите и поминаите. Христосъ же да сподобит вся ны одесную себе стати въ страшныи день пришествия Его со всѣми угожьшими от вѣка, Ему же подобаеть всяка слава, честь и покланяние с безначалнымь Отцьмь и с присносущимь, и с пресвятымь благимь и животворящимь Духомь и ныня и присно и въ вѣкъ вѣкомъ аминь. Въистину право буди то, аминь истолкованъ натрое.

Писцовая