Текст на языке оригинала
Божьею милостию мы, великий государь, царь и великий князь Иван Васильевич всеа Руси, пожаловал есми богомольца свое Великого Новагорода и Пскова архиепискупа Леонида или хто по нем иный богомолец наш, Великого Новагорода Пскова архиепискуп, будет в Новегороде. И что в нашей отчине в Новегороде, и во Пскове, и в Ноугородцкой, и во Псковской земле, и во всех пригородиех псковские земли его села и деревни, и хто у него в тех селех и в деревнях учнет жити людей и крестьян, и наместницы наши наугородцкие, и псковские, и пригородцкие, и волостели, и их тиуны тех его людей и крестьян не судят ни в чем, опричь душегубства и розбоя с поличным. И кормов своих възезжих или которых поборов не емлют, и приставов своих на них не дают ни в чом, а ведает и судит тех людей и крестьян сам архиепискуп или кому прикажет, а во Пскове намесник его псковской во всем, и в татьбе с поличным. А коли нашим наместником наугородцким и псковским лучитца послати по архиепискуплих людей и крестьян своих приставов и в душегубстве и в розбое с поличным, архиепискуп и его псковской намесник с наших намесников приставы по тех людей и по крестьян посылает архиепискупля пристава. И которых архиепискуплих людей и крестьян приведут, ино их судят наши наместники да архиепискупль наместник или кому архиепискуп прикажет с ними же судит. И в суде у наших намесников архиепискуплих людей и крестьян во всяких делех бережет. А случитца суд смесной тем его людем и крестьяном з городскими людми и с волостными или с пригородскими, и наместницы наши наугородцкие, и псковские, и пригородцкие, и волостели, и их ти[у]ны тех его людей и крестьян судят. А архиепискупль намесник или кому архиепискуп прикажет с ними же судит. А прав ли, виноват ли будет городъцкой человек, и пригородцкой, или волостной, и он в правде и в вине намесником нашим наугородцким, и псковским, и пригородцким, и волостелем, и их тиуном. А прав ли, виноват ли будет архиепискупль человек или крестьянин, и он в правде и в вине в Великом Новегороде богомольцу нашему архиепискупу, а во Пскове намеснику. А намесницы наши наугородцкие, и псковские, и пригородцкие, и волостели, и их тиуны у архиепискупа и во Пскове у его намесника в правого и в виноватого не вступаютца. Да и в суд владычин во всей вотчине в Новегороде, и во Пскове, и во Псковской земле, и во всех пригородиех наугородцких и псковских над игумены, и над попы, и над дияконы, и надо всем причтом церковным велел есми ведать архиепискупу, а во Псков кого он пошлет намеснику его. И пошлину с них судную имати от печати и духовных грамот велел есми имати пошлину его намеснику псковскому по тому ж, как наперед сего во Пскове, и во Псковской земле, и в пригородкех [так!] псковских ту пошлину имали с попов и от духовных грамот при прежних архиепискупех Великого Новагорода и Пскова. А збираючи те его пошлины, тот его намесник отдает в Великом Новегороде богомолцу нашему Великого Новагорода и Пскова архиепискупу Леониду или по нем иный архиепискуп будет. А о всех о тех делех тот его намесник псковской обсылаетца в Великий Новгород с нашим богомольцом архиепискупом Леонидом или по нем иный архиепискуп будет. Также есми богомольца своего архиепискупа Леонида пожаловал, или по нем иный архиепискуп Великого Новагорода и Пскова будет, и наши ноугородцкие наместницы, и псковские, и пригородцкие, и волостели, и их тиуны намесника его псковского и людей его не судят ни в чом, и приставов своих не дают опричь душегубства и розбоя с поличным. А кому будет до них каково дело смесное сыну боярскому, или городцкому человеку, или волостному, и наши намесницы обсылаютца с архиепискупом. А судит их богомолец наш Великого Новагорода и Пскова архиепискуп, а намесницы наши у богомольца нашего архиепискупа сами в суде живут. Также есми пожаловал богомольца своего архиепискупа Леонида или по нем иный архиепискуп будет, наши намесницы наугородцкие, и псковские, и пригородцкие, и волостели, и их тиуны в его светительские суды и в церковные люди не вступаютца, а ведает и судит те суды и весь причет церковный архиепискуп сам во всем, а во Пскове намесник его псковской или кому прикажет. Также есми пожаловал, ненадобе им ни мыт, ни явки, ни вещие [так!], и лугов моих не косят, и двора моего наместнича или волостелина не делают, ни прудов моих не прудят, ни выводные куницы, ни з дворским, ни с сотцким, ни с пятидесятцким с тяглыми людьми не тянут никоторые протори, ни в розметы. А ставят они двор архиепискупль, и дрова, и запас возят, и дело делают на архиепискупа. А хто у них в тех селех и в деревнях пойдет от своих рук, или хто з древа убьетца, или ково древо убиет, или в воде утонет, или водою напловет, или хто убитым подкинет, и наши намесницы и волостели и их тиуны в том на них продажи и езду не емлют, а осмотрив того, велят схоронити безпенно. А наши князи, и дети боярские, и ратные воеводы, и ловчеи, и пъсари, и бобровъники, и всякие ездоки в тех его селех не ставятца, ни кормов, ни подвод, ни проводников у них не емлют, и гонцы подвод и проводников у них не емлют же опричь ратных вестей. А хто у них станет силою да что возмет, и тому платит без суда и без управы. А мои, царя и великого князя, селчане и намесников и волостелей наши люди к архиепискуплим людем на пиры и на братчины незваны не ходят, а хто к ним придет на пир и на братчину незван, ино того вышлют вон безпенно. А хто у них учнет пити сильно, а учинитца в те поры гибель, и тому платить та гибель вдвое без суда и без исправы. Также есми богомольца своего архиепискупа пожаловал, по тем его селам и по деревням попрошатаи не ездят, ни скоморохи не играют. А хто по его селом и по деревням попрошатаи учнет ездить или скоморохи у них учнут играти сильно, и архиепискупль приказщик ис тех сел и деревень вышлет вон безпенно. А явят сю грамоту намесником псковским, ноугородцким и воронашским, и волостелем, и их тиуном, и они с нее явки не дадут никому ничего. А кого пожалую, дам на грамоты грамоту, а на сю мою грамоту грамоты нет. Дана грамота в нашей отчине в Великом [Новом городе лета 7080-го августа в 16].