РНБ; F.I.193, л. 411–411 об._писцовая запись

РНБ; F.I.193, л. 411–411 об._писцовая запись

РНБ; F.I.193, л. 411–411 об._писцовая запись

На л. 411–411 об. пространная запись (текст в один столбец) писца Сидки Молчанова о написании рукописи по повелению князя Андрея Васильевича (Меньшого). Запись выполнена витиеватым почерком, с множеством лигатур и украшений, в отличие от книжного полуустава основного текста.

«В лѣто 6986, индикта 11 въ дръжавное лѣто благочестиваго царя великаго князя Иоанна Василиевича и сына его благовѣрнаго и благороднаго великого князя Иоана Иоановича московьскаго и володимерьскаго и новогородскаго Новагорода Великаго и всеа Руси, того же бяше лѣта и приведенъ бысть Новъгород Великии великаго князя саблею Иоанна Василиевича къ русскому господарьству, и при его братии благовѣрных князех при князи Андрѣе и при князи Борисѣ и при князи Андрѣе Василиевичих, и при архиепископѣ всея Руси Геронтеи ноемвриа месяца въ 1 на память святых чюдотворець и бесръбреникъ Козмы и Дамиана. Словеса убо еже хартиею и чрънилом книгы сия приаша конец, и руцѣ наши препочиша, съвершивше весело твоих повелѣнии господолюбивое и желанное орудие, уму же твоему, о любимыи господарю, да не будет когда приати конец въ любителех душепитателных словесъ, аще когда будет благых наслаждение. Начата же бысть писати сия божественаа книга Иоанъ Златоустъ, еже есть Маргарит, замышлением еже и хотѣнием и любовию сердечьною благовѣрнаго и христолюбиваго княза Андрѣа Василиевича меншего въ градѣ нарицаемом Москвѣ на память великомученика Панделѣимона иулиа 27, и достиже конца божестъвному писаниу ноемвриа 1, рукою послѣднѣго въ грѣшницѣх и грубаго в людех грѣхослужимою десницею раба Божиа Сидка Молчанова. Вы же, о господе и отцы и братиа и еже о Господѣ сродници и священническаа чета, вас бо молю, христолюбци и книголюбци и любимии любимици, и метание творю до лица земнаго, аще убо которому вас привниде нѣкое рачительство, хотя приникнути въ сие грѣхослужимое написание, и аще где описался своим грубым смыслом или съ другом глаголаниемь, или забытиемь, исправьте Бога ради, но и да не вмѣните убо в поношение нашеи худости. Вѣм бо, господа и отцы и братиа, яко царьскыми трапезами насыщаетеся, но не мимошествуите мене убогаго и грубаго, ни гнушаитеся, ниже похулите, якоже иерѣи левиитъ преминуа, но уподобитеся оному самарянину, въсприимшему ураненаго и на свои скот въземша и вь гостинницю принесша и мзду обѣщавшу. Вам же Господь воздаст в сии вѣкъ и в грядущии, еже требуете от Господа. Богъ же мира буди с вами, и здравствуите о Господѣ».

Л. 411–411 об.

1478

Иван Иванович Молодой, удельный князь Тверской (1485–1490)

Писцовая